Qazaqstan muǵalimderiniń 80 paiyzdan astamy sabaq berý barysynda kompiýter men noýtbýkti paidalana alady. Bul týraly Aqparattyq taldaý ortalyǵynyń prezidenti Madina Tynybaeva aitty, dep habarlaidy QazAqparat.
«Aqparattyq taldaý ortalyǵy IýNESKO-men birlesip, qazaqstandyq muǵalimderdiń AKT quzirettiligine zertteý júrgizdi. IýNESKO muǵalimderdiń AKT quzirettiligi qurylymyn 3 deńgeimen 6 aspektide ázirledi. Bilim alý deńgeiinde muǵalimderdiń negizgi bazalaq AKT quziretteri bar ekenin kórsetti. Bilimdi igerý deńgeiinde muǵalimder AKT-ny belgili bir pándi oqytý baǵdarlamasyna, oqý úderisine jáne baǵalaý júiesine biriktire alady. Bilim qurý deńgeiinde ozyq praktikalardy modeldeýge jáne oqýshylardyń jańa bilimderin qalyptastyrýǵa yqpal etetin quziretterge ie», - dedi ol vedomstvonyń apparat jinalysynda.
Ortalyq basshysynyń atap ótýinshe, zertteý qazaqstandyq mektepterdiń pán muǵalimderi arasynda ózderi toltyrǵan saýalnamalardy paidalana otyryp, osy jyldyń qańtar-aqpan ailarynda onlain formatta júrgizilgen.
«Respondentterdiń kópshiligi jumys kompiýterlerimen, noýtbýktermen mektep qamtamasyz etti dep kelisedi. 60 paiyzdan astamy qurylǵylarda jumys isteýge qajetti qosymshalar bar ekendigin atap ótti. Muǵalimderdiń 80 paiyzdan astamy óz jumysynda kompiýterler men noýtbýkterdi paidalana alady. Bul rette pedagogterdiń shamamen 23 paiyzy internettiń turaqtylyǵy men jyldamdyǵyna qatysty problemalardyń bar ekendigin atap ótti. Aýyldaǵy jáne qaladaǵy muǵalimderdiń kópshiligi bilim berý saittarynan jáne ashyq resýrstardan aqparatty paidalanady», - dedi Madina Tynybaeva.
Onyń dereginshe, orta eseppen alǵanda muǵalimder ýaqyttyń 30-dan 70 paiyzyna deiin AKT-ny qoldana otyryp sabaq beredi.
«Muǵalimder óz quziretterin ózderi baǵalady. Respondentterdiń 92 paiyzy elektrondy jýrnaldarmen jumys isteý quzirettiligin orta deńgeiden joǵary, salystyrmaly túrde joǵary jáne joǵary baǵalady. 80 paiyzy slaid jasaý quzirettiligin, 54 paiyzy aýdio jáne video málimetter jasaý quzirettiligin kórsetti. Pedagogter ózderiniń AKT quzirettiligin joǵary baǵalaǵanyna qaramastan saýalnamaǵa qatysqandardyń 45 paiyzǵa jýyǵy bazalyq AKT daǵdylar boiynsha kýrstar qajet etetindigin atap ótti. Saýalnamaǵa qatysqan muǵalimderdiń úshten biri sońǵy 24 aida mektep deńgeiinde AKT boiynsha biliktiligin arttyrmaǵandyǵyn kórsetti», - dedi ortalyq basshysy.
