Hákim Abai Qunanbaiulynyń 175 jyldyq mereitoiyna orai Ystanbul qalasy Zeitinbýrný aýdanynda Abai dańǵyly jáne eskertkishi saltanatty túrde ashyldy, dep habarlaidy "Ult aqparat".
18 naýryzda Qazaqstan Respýblikasy Premer-Ministriniń orynbasary – Syrtqy ister ministri Muhtar Tileýberdiniń Túrkiia Respýblikasyna resmi sapary aiasynda Ystanbul qalasynda boldy.
Ystanbulǵa sapar kezinde QR SIM basshysy M.Tileýberdi Abai Qunanbaiulynyń 2020 jylyndaǵy 175 jyldyq mereitoiyna josparlanǵan Qazaqstannyń Túrkiiadaǵy Elshiligi, QR Ystanbul Bas konsýldyǵy jáne Ystanbul Zeitinbýrný aýdanynyń Meriiasymen birlesip uiymdastyrǵan qazaq halqynyń uly tulǵasy, túrki áleminiń uly aqyny, kompozitor, qazaq ádebietiniń negizin qalaýshy Abai Qunanbaiuly atyndaǵy alań pen eskertkishtiń saltanatty ashylýyna qatysty.
Saltanatty ashylý sharasyna Qazaqstan Respýblikasy Premer-Ministriniń orynbasary – Syrtqy ister ministri Muhtar Tileýberdi, Ystanbul qalasynyń meri Ekrem Imamoglý, QR Túrkiiadaǵy Elshisi Abzal Saparbekuly, Zeitinbýrný aýdanynyń meri Omer Arysoi, QR Ystambul Bas konsýly Álim Baiel jáne qazaq diasporasynyń ókilderi qatysty.
Sonymen qatar Abai atyndaǵy alań men eskertkishtiń ashylýy Ystanbul qalasy meriiasynyń májilisiniń sheshimimen qabyldandy. Aqyn esimin alańǵa berý týraly sheshim Qazaqstannyń Túrkiiadaǵy Elshiligi men Ystanbuldaǵy Bas konsýldyǵy júrgizgen jumystyń nátijesinde júzege asty. Alańdaǵy Abai músininiń avtory QR Kórkemóner akademiiasynyń tolyq múshesi, qazaqstandyq músinshi Murat Mansurov.
Is-shara Ystanbulda turatyn qazaq diaspora ókilderi tarapynan uiymdastyrylǵan kontserttik baǵdarlamamen jalǵasyn tapty.
Is-sharadan keiin QR Premer-Ministriniń orynbasary – Syrtqy ister ministri M.B. Tileýberdi, 2003 jyly Qazaqstan Respýblikasynyń Tuńǵysh Prezidenti Nursultan Nazarbaevtyń qatysýmen ashylǵan Zeitinbýrný aýdanynda ornalasqan Abai mektebine bardy.
Jýyrda mekteptegi Abai eskertkishiniń jóndeý-jańartý jumystary atqarylyp, eskertkish ainalasyna gúlzar salynyp, jol jańartylyp, mektep ǵimaratynyń ishinde «Abai buryshy» jasaqtaldy. M. Tileýberdi oqýshylarmen kezdesip, bilim ordasyna óziniń syiyn tartty.
