Ystanbuldaǵy túrki jáne islam óneri murajaiynda TÚRKSOI Halyqaralyq túrki mádenieti uiymy jáne Qazaqstan Respýblikasy Ortalyq memlekettik murajaiy uiymdastyrǵan «Uly Dalanyń tarihi-mádeni murasy» atty kórme ashyldy, dep habarlaidy "Ult aqparat" TÚRKSOI baspasóz qyzmetine silteme jasap.
Kórmeniń ashylýyna Qazaqstan men Túrkiiadan birqatar joǵary qyzmettegi qonaqtar, óner baǵalaýshylary qatysty.
Óz sózinde TÚRKSOI uiymynyń Bas hatshysy Dúisen Qaseiinov Halyqaralyq túrki mádenieti uiymy biylǵy jyly TÚRKSOI uiymynyń 25 jyldyǵy aiasynda túrki mádenieti men ónerin áigilendirý maqsatymen álemniń túkpir-túkpirinde aýqymdy is-sharalar ótkizip otyrǵanyn atap ótti.
TÚRKSOI uiymynyń basshysy, sondai-aq, búkilálemdik mádeniet jáne óner astanasy bolyp tabylatyn Ystanbulda osy joly Qazaqstannyń Ortalyq memlekettik murajaiymen birlesip biregei kórme ashylatynyn habarlady. Alyp qala turǵyndary bul kórmede qazaq jeriniń arheologiialyq, etnografiialyq, sondai-aq tarihi-mádeni murasymen jaqynyraq tanysý múmkindigine ie bolady.
Dúisen Qaseiinovtiń aitýynsha, tarih pen mádeniet súiýshileri kórmede qoiylǵan eksponattardyń arasynda túrki halyqtarynyń burynǵy tarihy týraly stereotipterdi ózgertip, Qazaqstan Respýblikasynyń ulttyq simvolyna ainalǵan «Altyn adamdy» da kóre alady.
Kórmeniń barysynda TÚRKSOI halyq aspaptary orkestrindegi qazaq mýzykanttary dástúrli qazaq mýzykasynyń shaǵyn kontsertin usyndy.
«Uly Dalanyń tarihi-mádeni murasy» kórmesi 2018 jylǵy 9 jeltoqsanyna deiin jumys isteidi.
