ىستانبۇلداعى تٷركٸ جەنە يسلام ٶنەرٸ مۇراجايىندا تٷركسوي حالىقارالىق تٷركٸ مەدەنيەتٸ ۇيىمى جەنە قازاقستان رەسپۋبليكاسى ورتالىق مەملەكەتتٸك مۇراجايى ۇيىمداستىرعان «ۇلى دالانىڭ تاريحي-مەدەني مۇراسى» اتتى كٶرمە اشىلدى, دەپ حابارلايدى "ۇلت اقپارات" تٷركسوي باسپاسٶز قىزمەتٸنە سٸلتەمە جاساپ.
كٶرمەنٸڭ اشىلۋىنا قازاقستان مەن تٷركييادان بٸرقاتار جوعارى قىزمەتتەگٸ قوناقتار, ٶنەر باعالاۋشىلارى قاتىستى.
ٶز سٶزٸندە تٷركسوي ۇيىمىنىڭ باس حاتشىسى دٷيسەن قاسەيٸنوۆ حالىقارالىق تٷركٸ مەدەنيەتٸ ۇيىمى بيىلعى جىلى تٷركسوي ۇيىمىنىڭ 25 جىلدىعى اياسىندا تٷركٸ مەدەنيەتٸ مەن ٶنەرٸن ەيگٸلەندٸرۋ ماقساتىمەن ەلەمنٸڭ تٷكپٸر-تٷكپٸرٸندە اۋقىمدى ٸس-شارالار ٶتكٸزٸپ وتىرعانىن اتاپ ٶتتٸ.
تٷركسوي ۇيىمىنىڭ باسشىسى, سونداي-اق, بٷكٸلەلەمدٸك مەدەنيەت جەنە ٶنەر استاناسى بولىپ تابىلاتىن ىستانبۇلدا وسى جولى قازاقستاننىڭ ورتالىق مەملەكەتتٸك مۇراجايىمەن بٸرلەسٸپ بٸرەگەي كٶرمە اشىلاتىنىن حابارلادى. الىپ قالا تۇرعىندارى بۇل كٶرمەدە قازاق جەرٸنٸڭ ارحەولوگييالىق, ەتنوگرافييالىق, سونداي-اق تاريحي-مەدەني مۇراسىمەن جاقىنىراق تانىسۋ مٷمكٸندٸگٸنە يە بولادى.
دٷيسەن قاسەيٸنوۆتٸڭ ايتۋىنشا, تاريح پەن مەدەنيەت سٷيۋشٸلەرٸ كٶرمەدە قويىلعان ەكسپوناتتاردىڭ اراسىندا تٷركٸ حالىقتارىنىڭ بۇرىنعى تاريحى تۋرالى ستەرەوتيپتەردٸ ٶزگەرتٸپ, قازاقستان رەسپۋبليكاسىنىڭ ۇلتتىق سيمۆولىنا اينالعان «التىن ادامدى» دا كٶرە الادى.
كٶرمەنٸڭ بارىسىندا تٷركسوي حالىق اسپاپتارى وركەسترٸندەگٸ قازاق مۋزىكانتتارى دەستٷرلٸ قازاق مۋزىكاسىنىڭ شاعىن كونتسەرتٸن ۇسىندى.
«ۇلى دالانىڭ تاريحي-مەدەني مۇراسى» كٶرمەسٸ 2018 جىلعى 9 جەلتوقسانىنا دەيٸن جۇمىس ٸستەيدٸ.
