© Photo: Qazaqstannyń Tótenshe jaǵdailar ministrligi
Abai oblysynda eki ormanshy ys tiip ýlanǵan. Qazir olardyń jaǵdaiy jaqsaryp keledi. Bul týraly óńir basshysy Nurlan Uranhaev málimdedi, dep habarlaidy Sputnik Qazaqstan.
"Qazirgi ýaqytta órt saldarynan 3 úi, 2 tehnika órtendi. Ys tiip ýlanǵan ormanshylyqtyń 2 qyzmetkeriniń jaǵdaiy jaqsaryp keledi", - dedi Nurlan Uranhaev úkimet otyrysynda.
Ákimniń aitýynsha, joǵalǵan traktorshy Sergei Arhipovty izdeý jalǵasyp jatyr.
13 maýsymdaǵy jaǵdai boiynsha órttiń jalpy aýdany shamamen 60 myń gektardy quraidy, onyń 43 myń gektary – belsendi termo núkteler.
"Eldi mekenderge qaýip joq. Órtti sóndirý eki baǵytta jalǵasýda", - dedi ol.
Qazir Bulaq, Talitsa, Polovinki eldi mekenderiniń turǵyndary evakýatsiialanǵan. Kóshirý oryndarynda politseiler kezekshilik atqaryp júr. Órt sóndirýge tartylǵan jáne evakýatsiialanǵan azamattar úshin azyq-túlik jetkizilip jatyr.
"Prezidenttiń tapsyrmasymen Ýspenskii ormanshylyǵynyń qaza tapqan 14 jumysshysynyń otbasyna kómek kórsetilýde. Búgingi tańda árbir otbasyna biýdjet jáne biýdjetten tys qarajat aiasynda qajetti kómektiń derbes kartalary jasaldy. Sonymen qatar, zardap shekkenderge kómek kórsetý jáne órt saldaryn joiý úshin arnaiy "Aq Ertis" qaiyrymdylyq qorynda shot ashyldy", - dedi Uranhaev.
Oblys ákiminiń aitýynsha, barlyq memlekettik tólem ýaqytyly jáne tolyq kólemde kórsetiledi.
