Qoja Ahmet Iasaýi atyndaǵy halyqaralyq qazaq-túrik ýniversitetine erekshe mártebe berildi, – dep habarlaidy QR Bilim jáne ǵylym ministrligi.
Qazaqstan Respýblikasy Prezidentiniń 2020 jylǵy 15 qańtardaǵy Jarlyǵymen Qoja Ahmet Iasaýi atyndaǵy halyqaralyq qazaq-túrik ýniversiteti erekshe mártebege ie boldy.
«Ýniversitet - 1992 jyly Elbasy N. Á. Nazarbaevtyń bastamasymen Qazaqstannyń ejelgi qalasy Túrkistanda quryldy jáne búginde Qazaqstandaǵy jalǵyz halyqaralyq oqý orny. Oqý ordasy halyqaralyq korporativtik basqarýdyń biregei júiesine - Úkimetaralyq ókiletti keńeske, Senatqa jáne Basqarýshy keńeske ie. Bilim berý qazaq, túrik, orys jáne aǵylshyn tilderinde júrgiziledi» delingen habarlamada.
Búgingi kúni álemniń bir de bir megapolisi biregei mazmunmen toltyrylǵan jáne suranysqa sai kásibi mamandar daiarlaýdy damytýdyń baǵyttaryn anyqtaityn ǵylymi jáne bilim berý mekemesi bolmasa, ekonomikalyq ortalyq bola almaidy. Qazaqstan Prezidenti Qasym-Jomart Toqaev bul máselege, iaǵni, bilim sapasyn arttyrýǵa, onyń halyqaralyq standarttarǵa sai bolýyna, ǵylym men bilimniń integratsiiasyna basa nazar aýdaryp otyr. Bul, ásirese, túrki áleminiń mádeni-rýhani ortalyǵy bolý jáne Túrkistan oblysynyń bilim-ǵylym haby retinde damý mindetteri turǵan Túrkistan qalasy úshin óte mańyzdy.
«Ýniversitettiń erekshe mártebesi oǵan úlken akademiialyq jáne basqarýshylyq derbestik bere otyryp, Ph.D. filosofiia doktory men sala boiynsha doktor dárejesin taǵaiyndaýǵa, bilim baǵdarlamalarynyń mazmunyn anyqtaýǵa jáne jeke úlgidegi diplomdardy berýge múmkindik jasaidy. Bilim grantynyń quny da artady. Bul professorlyq-oqytýshylyq quramnyń jalaqysyn arttyrýǵa jáne materialdyq-tehnikalyq qamtamasyz etýdi jańartýǵa múmkindik beredi» dep málim etti ministrlikten.
Bul sharalardyń barlyǵy ýniversitetke ǵylymi jáne pedagogikalyq kadrlardy tartýǵa, osy aimaqtyń damýyna serpin berip, onyń aldyna qoiylǵan maqsattarǵa jetýge yqpal etetin bolady.
