Almaty qalasy Medeý aýdanynyń memlekettik kirister basqarmasy jolaýshy tasymaldaýmen ainalysatyn júrgizýshilerdi salyq tóleýge mindetteý jumystaryn jalǵastyryp jatyr, dep habarlaidy QazAqparat tilshisi.
Endigi kezekte barlyq taksi qyzmetteri júrgizýshilerdiń tabysy jóninde salyq organdaryna habar berip otyratyn boldy. Memlekettik kirister departamenti men «Iandeks Taksi» kompaniiasy osyndai memorandýmǵa qol qoidy.
Búginde «Iandeks Taksi» servisi Qazaqstannyń 20 qalasynda jumys istep tur. Salyq organdarynyń málimdeýinshe, byltyr bir aidyń ishinde bul kompaniia 62 mln ret adam tasymaldaǵan. Bul statistika kúnnen kúnge ósip keledi.
«Iandeks Taksi» servisi qyzmetinde júrip, qosymsha tabys taýyp júrgen jeke júrgizýshiler salyq tóleýge mindetteledi. Alaida olardyń kópshiligi qazir salyq tóleýden jaltaryp júr. Osyǵan bailanysty basqarma men taksi qyzmetin atqaratyn «Iandeks Taksi Qazaqstan» kompaniiasy ózara ýaǵdalastyqqa keldi.
Memorandýmǵa sáikes, «Iandeks Taksi Qazaqstan» barlyq servis qoldanýshy júrgizýshilerge salyq tóleýdi mindetteitin bolady. Sonymen qatar, osy servis arqyly jumys jasaityn taksoparkter biyl 1 aqpannan bastap salyq organdaryna jeke júrgizýshiler jaily málimet berip otyrmaq.
Salyq kodeksiniń ózgerýi men qosymshasyna bailanysty biyldan bastap bul salyq tóleýshi kategoriiadaǵylar eki tásilmen tólem júrgize alady. Onyń birinshisi - jeke kásipker retinde tirkelý arqyly óz kirisinen 1 paiyz tólep otyrý. Ekinshisi - salyq organdaryna tirkelmei, ai saiyn barlyq quqyqtyq sharttardy oryndap, biryńǵai jiyntyq tólemdi tóleý.
