Búgin Májilistiń jalpy otyrysynda «TMD-ǵa qatysýshy memleketterdiń iadrolyq avariia nemese radiatsiialyq avariialyq ahýaldyń týyndaý jaǵdaiyna daiyndyqty jáne olardyń zardaptaryn joiý kezindegi ózara kómekti qamtamasyz etý boiynsha ózara is-qimyly týraly kelisimdi ratifikatsiialaý týraly» zań jobasy maquldandy, dep habarlaidy "Ult aqparat".
Kelisimdi ázirleý 2016 jylǵy 18 naýryzdaǵy TMD-ǵa qatysýshy memleketterdiń atom energiiasyn beibit maqsatta paidalaný salasyndaǵy iadrolyq jáne radiatsiialyq qaýipsizdik tujyrymdamasyn iske asyrý jónindegi birinshi kezektegi is-sharalar josparynda qarastyrylǵan.
«Osy Kelisimdi ratifikatsiialaý iadrolyq avariia nemese radiatsiialyq avariialyq ahýal týyndaǵan jaǵdaida TMD-ǵa qatysýshy memleketter arasynda aqparat pen kómekti jedel usynýǵa múmkindik beredi.
Kelisim TMD-ǵa qatysýshy memleketterdiń ýákiletti organdary arasyndaǵy ózara is-qimyldyń tiimdiligi men ónimdiligin arttyrýǵa, atom energiiasyn beibit maqsatta paidalanýǵa bailanysty kez kelgen yqtimal oqiǵalarǵa ýaqtyly den qoiýǵa baǵyttalǵan. Kelisim jobasy TMD Ekonomikalyq Keńesiniń 2018 jylǵy 14 maýsymdaǵy otyrysynda maquldanǵan jáne oǵan 2018 jylǵy 2 qarashada Astana qalasynda TMD úkimet basshylary keńesiniń otyrysy aiasynda Qazaqstan Respýblikasynyń Premer-Ministri qol qoidy», - dedi QR Energetika ministri Nurlan Noǵaev.
Kelisimniń taraptary: Armeniia Respýblikasy, Belarýs Respýblikasy, Qazaqstan Respýblikasy, Qyrǵyz Respýblikasy, Resei Federatsiiasy, Tájikstan Respýblikasy jáne Ózbekstan Respýblikasy.
«Osy Kelisim iadrolyq avariia nemese radiatsiialyq avariialyq ahýaldyń týyndaý jaǵdaiynda mamandandyrylǵan qutqarý qurylymdaryn, mamandardy, qural-jabdyqtardy, kólik quraldaryn jáne osy qurylymdardy tehnikalyq jaraqtandyrý úshin paidalanylatyn materialdardy transshekaralyq ótkizý rásimderin jeńildetýge múmkindik beredi. Qazaqstan Respýblikasynyń «Atom energiiasyn paidalaný týraly» Zańynyń 23-babynyń 6-tarmaǵyna sáikes, atom energiiasyn paidalaný salasynda transshekaralyq avariialar nemese oqys oqiǵalar týyndaǵan jaǵdaida, Qazaqstan Respýblikasy ratifikatsiialaǵan halyqaralyq sharttarǵa sáikes ýákiletti organ azamattyq qorǵaý salasyndaǵy ýákiletti organmen birlesip, qulaqtandyrý jáne den qoiý jónindegi sharalardy qabyldaidy», - dedi ministr.
