Japoniianyń Tokio qalasynda XXXII Jazǵy Olimpiada oiyndarynyń alaýy jaǵyldy, dep habarlaidy "Ult aqparat".
Olimpiada alaýyn jaǵý qurmetine japon tennisshisi Naomi Osaka ie boldy.
Saltanatty rásim Japoniianyń 68 myń adam syiatyn Ulttyq stadionynda ótti. Al, dúbirli doda 23 shildede bastalyp, 8 tamyzda máresine jetpek.
Aita ketsek, Olimpiada 2020 jyly osy ýaqyt aralyǵynda ótkizilýi tiis bolatyn. Álemdi jailaǵan koronavirýs pandemiiasyna bailanysty ol bir jylǵa keiinge shegerildi.
Aldyn ala málimet boiynsha aitýly alamanǵa Jer sharyndaǵy 206 memleketten 11 myńnan astam sportshy qatysady dep kútilýde. Jarysqa qatysýshylardyń teń jartysyna jýyǵy áielder bolmaq.
Biyl dúbirli dodada 33 sport túrinen 339 medal jiyntyǵy sarapqa salynady. Olimpiada baǵdarlamasyna beisbol/softbol, karate, serfing, sporttyq quzǵa órmeleý jáne skeitbording sekildi sporttyń bes túri engizilgen.
Olimpiadanyń ashylý saltanatyna 950 resmi tulǵa qatysty. Olardyń arasynda 15 memleket pen halyqaralyq uiym basshylary bar. Degenmen qaterli indetten saqtyq sharalaryna bailanysty stadionǵa jankúierler jiberilgen joq.
Byltyr Tokio Olimpiadasynyń boitumary retinde Miraitova jáne Someiti bekitilgen edi. Japon tilininen tárjimalaǵanda Miraitova «bolashaq» jáne «máńgilik» sózderinen quralǵan. Bul bolashaqqa qadam basyp, álemdegi barsha halyqtyń júregine máńgilik senim ornatý degen oidy bildiredi. Al Someiti - gúldegen sakýranyń sortynan týyndaǵan sóz. Ol qiyndyqqa moiymai, shekaralardy buzyp ótetin paralimpiadashylardyń basty boitumary bolmaq.
