Áleýmettik jelide Baǵdagúl emshi esimimen tanylǵan áiel Qairat Nurtastyń Shymkenttegi kontsertinde bolǵan oqiǵaǵa qatysty pikir bildirdi. Ol uiymdastyrýshylardyń jaýapkershiligin kóterip, kórermenderdiń qaýipsizdigin qamtamasyz etýdi talap etti, dep habarlaidy ult.kz.

Instagram paraqshasynda jariialaǵan videosynda Baǵdagúl bilet satyp alǵan ár adamǵa tiisti jaǵdai jasalýy kerektigin aitty. Ol mádeniet salasyna jaýapty tulǵalarǵa da saýal qoiyp, kópshilik sharalarda adam ómiri men densaýlyǵy birinshi orynda turýy qajet ekenin jetkizdi.

"Halyqtyń taǵdyry sizderge oiynshyq pa? Bir qyz reanimatsiiaǵa tústi. Ol qyzdyń ómiri oiynshyq pa senderge? Ár adam aqsha tólep kirdi, tegin kirgen joq. Aqsha tólep kirdi me, onyń ornyn belgilep, taýyp berýińiz kerek. Túsinikti me sizge, Gúlzira hanym? Sizder halyqty olai basynbańyzdar", – dedi ol.

Baǵdagúl kontsertke kelgen adamdardyń sany jóninde taraǵan málimetterge kúmán keltirdi. Onyń pikirinshe, uiymdastyrýshylar bilet satarda alańnyń qansha kórermenge arnalǵanyn eskerýge mindetti. Al tártip pen jaýapkershilik talaptary mundai sharalardy ótkizetinderge de birdei qoiylýy kerek.

"Qazaqstanda tártip ornatasyzdar ma? Qarapaiym halyqqa ǵana emes, osyndai kisilerdi birinshi tártipke salý kerek. Halyqtyń densaýlyǵy sizderge oiynshyq emes", – dedi Baǵdagúl.

Aita keteiik, Baǵdagúl emshi ózin kelini sotqa bergenin aitty.

Qairat Nurtastyń Shymkenttegi kontsertinde ne boldy?

10 qazanda Shymkenttegi Qajymuqan Muńaitpasov atyndaǵy stadionda ótken Qairat Nurtastyń kontsertine kireberiste adamdar bir-birin qysyp, keptelis bolǵan. Saldarynan 18 jastaǵy qyz jaraqat alyp, aýrýhanaǵa jetkizilgen. Qalalyq densaýlyq saqtaý basqarmasynyń málimetinshe, segiz adam meditsinalyq kómekke júgingen, olardyń jeteýi tekserilgennen keiin úiine qaitarylǵan.

Politsiianyń aldyn ala málimeti boiynsha, alańnyń syiymdylyǵynan artyq bilet satylǵan. Oqiǵadan keiin kontsertti uiymdastyrǵan 1984 jyly týǵan azamat ustalyp, ýaqytsha ustaý izoliatoryna qamalǵan. Qaýipsizdik talaptarynyń buzylýyna bailanysty qylmystyq is qozǵalyp, tergeý júrip jatyr.

Qairat Nurtas kim?

Qairat Nurtas - qazaqstandyq estrada ánshisi, akter jáne prodiýser. 1989 jyly 25 aqpanda Túrkistan qalasynda dúniege kelgen. Sahnaǵa bala kezinen shyǵyp, 2008 jyly Almatydaǵy Respýblika saraiynda alǵashqy jeke kontsertin ótkizgen.

Kópshilikke «Arman», «Aýyrmaidy júrek», «Seni súiem» sekildi ánderimen tanylǵan. Repertýarynda mahabbat, otbasy jáne týǵan jer taqyrybyndaǵy týyndylar bar. Ánshilikten bólek, «Ókinish» jáne «Arman. Perishteler uiyqtamaidy» filmderine túsken.