Foto: © RIA Novosti
Byltyr qyrkúiekte prezident Vladimir Pýtin "ishinara" mobilizatsiia jariialaǵan soń, Ýkrainadaǵy soǵysty qoldaityn reseilikter sany kúrt azaisa, bilik mobilizatsiia aiaqtalǵanyn habarlaǵannan keiin olardyń qatary qaitadan kúrt kóbeigen. Bul týraly reseilik "Obshestvennoe mnenie" ("Qoǵamdyq pikir") qory júrgizgen jabyq sotsiologiialyq zertteý qorytyndysyna súienip The Wall Street Journal basylymy habarlady.
Saýalnama nátijesi boiynsha, byltyr qyrkúiektiń aiaǵynda Ýkrainadaǵy "arnaiy áskeri operatsiiany" respondentterdiń 34 paiyzy qoldasa, qarashanyń basynda 80 paiyzǵa jetken.
Amerikalyq basylymnyń jazýynsha, bul zertteýge tapsyrys bergen Resei prezidenti ákimshiligindegiler elde taǵy da mobilizatsiia jariialansa, halyqtyń jappai narazylyǵyn oiatady degen úlken qaýip joq dep esepteidi.
Byltyr 21 qyrkúiekte Resei prezidenti Pýtin Ýkrainadaǵy soǵysty jalǵastyrý úshin "ishinara" mobilizatsiia jariialaǵan. Resmi málimet boiynsha, zapasta turǵan 300 myńnan astam reseilik ásker qataryna shaqyrylǵan.
Qazannyń aiaǵynda Resei qorǵanys ministri Sergei Shoigý mobilizatsiia aiaqtalǵany týraly esep berdi. Munan soń Pýtin áskerge shaqyrý aiaqtalǵanyn málimdegen, biraq tiisti jarlyqqa qol qoiǵan joq. Quqyq qorǵaýshylar Resei prezidentiniń málimdemesine qaramastan, zań júzinde "ishinara" mobilizatsiia áli toqtamaǵanyna nazar aýdarady.
Jeltoqsannyń aiaǵynda Ýkraina biligi men Batys elderiniń barlaý qyzmetteri 2023 jyldyń basynda Kreml qaitadan mobilizatsiia jariialap, bul joly armiia qataryna 500 myńǵa deiin adam alyp, Ýkraina jerinde taǵy bir keń kólemdi shabýyl bastaýy múmkin dep habarlaǵan. Ýkraina qorǵanys ministri Aleksei Reznikov Pýtin ásker qataryna alynatyn er azamattardy elden shyǵarmaý úshin shekarany jabýdy josparlap otyr dep málimdegen. Kreml bul sózdi joqqa shyǵaryp, ázirge ondai jospary joǵyn aitqan. Alaida Resei biligi qarýly kúshter qataryn 1,5 mln adamǵa deiin jetkizip, merzimdi áskeri qyzmet atqarýǵa shaqyrylatyn azamattardyń eń joǵarǵy jas mólsheri 30 jas dep belgileý josparyn jariialaǵan.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
