Foto: Qaraqiian aýdany ákimdigi / gov.kz
Búgin, 20 jeltoqsanda Qaraqiia aýdanynyń ákimi Symbat Tóretaevtyń bastamasymen West Oil Software qyzmetkerlerimen kelissózder protsesin júrgizýge áreket jasaldy, alaida jumysshylar «QazMunaiGaz» shtatyna jumysqa ornalasýdy talap etip, kelissózderden bas tartty, dep habarlaidy Qaraqiia aýdany ákimdiginiń baspasóz qyzmeti.
"Keshe, 19 jeltoqsanda Qaraqiia aýdanynyń ákimi Symbat Tóretaev West Oil Software narazylyq bildirýshi qyzmetkerleriniń ókilderimen kezdesý ótkizdi. Tóretaev narazylyq bildirýshilerdi jaǵdaidy syndarly baǵytqa aýystyrýǵa, kelissózder ústelinde bárin sheshýge shaqyrdy. Qyzmetkerler ákimniń usynysymen kelisti.
20 jeltoqsanda tańerteń «QazMunaiGaz» AQ tóraǵasynyń orynbasary Dáýletjan Hasanov, «Mańǵystaýmunaigaz» AQ basshysy Murat Mustafaev, West Oil software basshylyǵy jáne Qaraqiia aýdanynyń ákimi Symbat Tóretaev zańsyz ereýil ótetin jerge kelip, narazylyq bildirýshilerdi óz qatarynan belsendilerdi tańdap, kelissózder protsesin bastaýǵa shaqyrdy" - delingen habarlamada.
Alaida, West Oil Software qyzmetkerleri narazylyq aktsiiasyn zańdastyrýdy talap etip, kelissózderdi bastaýdan bas tartqan. Al Dáýletjan Hasanov óz kezeginde ereýil sottyń sheshimimen zańsyz dep tanylǵanyn jáne ony tek joǵary turǵan sot satysyna aryz berý arqyly joiýǵa bolatynyn túsindirgen.
"Kelisim komissiiasynyń jumysy aiasynda kelissózder protsesin bastaýdy usynamyz. Bul jaǵdaidy retteýdiń zańdy tásili, ony paidalaný qajet", - dedi Hasanov jinalǵandarǵa.
Degenmen WOS qyzmetkerleri «QazMunaiGaz» AQ shtatyna jumysqa ornalasýdy talap etip, kelissózderden bas tartqan.
"WOS-tyń birqatar qyzmetkeriniń «QazMunaiGaz» UK AQ-nyń eńbekaqy tóleýdiń biryńǵai júiesimen (ESOT) eńbekaqyny teńestirý, QMG enshiles kásipornynyń shtatyna kirý siiaqty qosymsha talaptary negizsiz bolyp tabylatynyn atap ótý qajet.
Aktsiianyń ózi 2023 jyldyń 11 jeltoqsanda Mańǵystaý oblysy Qaraqiia aýdanynyń soty zańsyz dep tanyldy.
Sondai-aq, WOS-tyń keibir qyzmetkerleri buryn Qazmunaigazdyń enshiles uiymdarynyń qyzmetkeri bolǵanyn jáne 2018 jyly 5/50 baǵdarlamasyn paidalanyp, óz erkimen jumystan shyqqanyn, sondai-aq atalǵan baǵdarlama aiasynda bes jyldyq jalaqysynyń 50% alǵanyn atap ótken jón. Ortasha alǵanda, bir adamǵa tólenetin tólem somasy shamamen 11 mln teńgeni qurady. Osy sebepti QazMunaiGazdyń ETU shtatyna kóshýi týraly talaptar da múmkin emes" - delingen habarlamada.
Ákimdik baspasóz qyzmetiniń málimetinshe, osy kúngi ereýilge bailanysty "West Oil Software" JShS kúnine shamamen 23 mln teńge shyǵyn ákelip otyr. Bul faktor kompaniianyń jáne onyń qyzmetkerleriniń, sonyń ishinde ereýilge qatyspaityn tikelei WOS qyzmetkerleriniń qarjylyq jaǵdaiyna nuqsan keltiredi.
