Volonterlik qyzmetti qarqyndy damytý úshin memlekettik organdarǵa birqatar mindet júkteý qajet. Bul týraly Úkimet otyrysynda QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Volonterlikti damytý isinde basty nátije memlekettik organdarǵa tikelei bailanysty. Árine, volonterlik aqy tólenbeitin erikti qyzmet. Dese de, ol jaǵdai jasaýdy, janashyrlyqpen qaraýdy talap etedi. Volonterlik qozǵalystyń qarqyndy damýy búgingi azamattyq bastamalarǵa laiyqty deńgeide qoldaý kórsetýge bailanysty. Osyǵan bailanysty memlekettik organdarǵa birqatar mindetti júkteý oryndy sanaimyn. Birinshi - volonterlik barlyq salany qamtityn ámbebap qyzmet. Sondyqtan 2021-2023 jyldarǵa arnalǵan jol kartasynyń aiasynan memlekettik organdar tys qalmaýy tiis», - dedi ol.
Ekinshiden, ministr úzdik volonterlik tájiribelerdi saýatty túrde nasihattap, aqparattyq túsindirý jumystaryn kúsheitý qajettigin aitty.
«Úshinshi, jergilikti atqarýshy organdarǵa volonterlik jobalardy qarjylandyrýdy ulǵaitý jáne volonterlik bastamalardy qoldaý múmkindikterin keńeitý kerek. Tórtinshi, volonterler kóteretin suraqtar negizinen áleýmettik mańyzy zor máseleler. Bul oraida jergilikti organdar tarapynan turaqty monitoring jasalyp, olardy ýaqytyly sheshý tetikterin qarastyrý qajet. Besinshi, «Igi ister» marafony respýblikalyq aktsiiasyna kásipkerler jáne uiymdarmen birge qarapaiym azamattardy da keńinen tartý qajet. Sebebi marafonnyń maqsaty tek demeýshilerdi tartyp, qaiyrymdylyq jasaý ǵana emes, kúndelikti jaqsy ister arqyly jany jomart, rýhy kemel qoǵam qalyptastyrý», - dedi Aida Balaeva.
