ATMÓ elderi volonterlerdi jumyldyrýdyń halyqaralyq jylyn jariialaý týraly Qazaqstannyń bastamasyn qoldaýǵa shaqyrdy, dep habarlaidy "Ult aqparat".
Búgin Bangkok qalasynda (Tailand) VIII Aziia-Tynyq muhity forýmy aiasynda «Volonterlik onjyldyqqa arnalǵan is-qimyldardy transformatsiialaý strategiiasy retinde» taqyrybynda paneldik pikirtalas ótti.
Is-sharaǵa onlain-formatta ZOOM alańyn qosý arqyly Qazaqstannyń Aqparat jáne qoǵamdyq damý vitse-ministri Bolat Tilepov qatysty.
Sóz sóileý barysynda Bolat Tilepov volonterlerdiń elimizdiń qoǵamdyq ómirindegi róli jáne Qazaqstanda eriktiler qozǵalysyn damytý úshin jasalyp jatqan jaǵdai týraly aityp berdi.
Osylaisha, ol Qazaqstanda «Volonter jyly» aiasynda ótken 2020 jyldyń ózinde volonterlik uiymdar men toptardyń sany 3 ese, turaqty volonterler sany 4 ese, olardyń sany 200 myńnan astam adam óskenin habarlady.
«Pandemiiamen kúres kezeńinde eriktiler qozǵalysyna 1 millionǵa jýyq qazaqstandyq qosylyp, 1,5 millionnan astam azamattarymyzǵa kómek kórsetildi», — dedi ol. Sonymen qatar, Bolat Tilepov Qazaqstannyń halyqaralyq volonterlikti damytý boiynsha jumys júrgizip jatqanyn erekshe atap ótti.
Yntalandyrý sharalarynyń biri - Qazaqstandaǵy Volonter jyly aiasynda qurylǵan «Jyl eriktisi» halyqaralyq syilyǵy.
Ótken jyly ony Qazaqstan, Resei, Qyrǵyzstannan kelgen 48 belsendi volonter aldy. Budan basqa, búginde BUU júiesinde Qazaqstannan 71 volonter qyzmet etedi, onyń ishinde 42 áiel, onyń ishinde 7 volonter QR Aqparat jáne qoǵamdyq damý ministrligi men BǴDU arasyndaǵy áriptestik týraly kelisim sheńberinde BUU-nyń túrli agenttikterine jiberilgen.
Bolat Tilepov Qazaqstan BUU BA qararynyń mátinine volonterlikti 2030 jylǵa deiingi kezeńge arnalǵan turaqty damý salasyndaǵy kún tártibin iske asyrýdyń ámbebap quraly dep taný týraly tarmaqty engizýge bastama jasaǵanyn eske saldy.
Esterińizge sala keteiik, bul qarar BUU-ǵa múshe elderden qoldaý taýyp, 2020 jyldyń jeltoqsanynda qabyldanǵan bolatyn.
«Ótken jyly Qazaqstan Prezidenti Q.Toqaev BUU Bas Assambleiasynyń 75-shi sessiiasynda eriktilerdi jumyldyrýdyń halyqaralyq jylyn jariialaý týraly bastama kótergen bolatyn. Búgingi tańda BUU DB-men ony ilgeriletý, BUU-nyń tiisti qararyn daiyndaý boiynsha birlesken jumys júrgizilýde. Osyǵan bailanysty turaqty damý jónindegi Aziia – Tynyq muhity forýmyna qatysýshy elderden Qazaqstannyń bastamasyn qoldaýdy jáne «igi ister« dúniejúzilik ideiasyn iske asyrýdy suraimyz» dedi Bolat Tilepov.
