Búgin Tailandtyń Nakhonratchasima qalasynda voleiboldan qyzdar arasyndaǵy Tokio Olimpiadasyna irikteý oiyndaryn Qazaqstan quramasy jeńispen bastady, dep habarlaidy "Ult aqparat".
Qazaqstandyq voleibolshylar Iranmen kezdesýinde barlyq sette jeńiske jetti. Alǵashqysynda olar qarsylasyn 25:14 esebimen jeńse, odan keiin 25:16 esebimen basym tústi. Sońǵysynda taǵy da 25:14 esebimen ailasyn asyrdy. Osylaisha qazaqstandyq voleibolshylar irikteý kezeńin jeńispen bastady.
Qazaqstan V tobynda Ońtústik Koreia, Iran jáne Indoneziia quramalarymen oinaidy. Endi olar 8 qańtarda Indoneziiamen sheberlik baiqassa, 9 qańtarda Ońtústik Koreiamen kezdesedi. Búgin atalmysh topta Ońtústik Koreia Indoneziiany 3:0 esebimen jeńdi.
Atalmysh memlekette A tobynda Tailand, Qytailyq Taibei, Avstraliia quramalarymen kezdesedi. 11 qańtarda jartylai final ótse, 12 qańtarda final bolady. Jeńimpaz qurama Olimpiadaǵa qatysýǵa múmkindik alady. Dúbirli dodada álemniń ár qiyrynan kelgen 12 quram baq synaidy.
Qazaqstan qyzdary 2008 jyly Olimpiada oiyndaryna qatysyp, onda jalpy komandalyq esepte toǵyzynshy oryn alǵan bolatyn.
Sondai-aq, búgin Qazaqstan erler quramasy Qytaidyń Tszianmyn qalasynda Tokio Olimpidasyna irikteý týrnirin bastaidy. Olar A tobynda Iran, Qytailyq Taibei, Qytai quramalarymen sheberlik baiqasady. Búgingi qarsylasy - Qytai. Odan keiin 8 qańtarda Iran, 9 qańtarda Qytailyq Taibei quramalarymen oinaidy.
Aziia qurlyǵy boiynsha V tobynda Avstraliia, Ońtústik Koreia, Úndistan jáne Katar voleibolshylary joldamaǵa talasady. Jartylai final men final 11-12 qańtarda ótedi. Jeńimpaz Olimpiadaǵa Aziia qurlyǵynan berilgen jalǵyz joldamaǵa ie bolady.
