Beisenbi kúni Úkimet úiinde QR Premer-Ministriniń orynbasary Berdibek Saparbaev «Eńbek» ónimdi jumyspen qamtý jáne jappai kásipkerlikti damytý memlekettik baǵdarlamasyn osy jyldyń 9 aiynda iske asyrý qorytyndylary boiynsha selektorlyq keńes ótkizdi, dep jazady primeminister.kz.
«Halyqtyń jumyspen qamtylýyn qamtamasyz etý – Elbasy men Memleket basshysynyń Úkimet aldyna qoiǵan mańyzdy mindetterdiń biri. Ol úshin bizge jańa jumys oryndaryn quryp, jumyssyzdardy biznes negizderine jáne suranysqa ie mamandyqtarǵa oqytý, mikro jáne shaǵyn biznesti damytýdy yntalandyrý qajet», — dedi vitse-premer.
QR eńbek jáne halyqty áleýmettik qorǵaý ministri Birjan Nurymbetovtyń aitýynsha, ótken kezeńde 496 myń qazaqstandyq baǵdarlama qatysýshysy boldy.
2017 jyldan bastap TjKBB-de kásiptik oqýǵa 52 901 adam jiberildi, onyń ishinde biyl — 21 854 adam. Sonymen birge, bilim alýshylardy jumysqa ornalastyrý máselesi ózekti bolyp qala bermek: 4 246 túlektiń tek 3 250-i nemese 76,5%-y jumysqa ornalasqan. Jumyspen qamtýdyń tómen deńgeii Almaty jáne Jambyl oblystarynda baiqalady.
Kadrlardyń qysqa merzimdi daiyndaýmen 41 180 adam nemese jyldyq jospardyń 69% qamtylǵan. Aýtsaiderler qatarynda Mańǵystaý (39,5%), Soltústik Qazaqstan (50,4%), Túrkistan oblystary (51,1%), Nur-Sultan (51,8%) jáne Shymkent (55,4%) qalalary bar.
«Qysqa merzimdi oqýdan ótken 20 myń azamattyń tek 11 myńy ǵana jumysqa ornalasqan», — dedi B. Nurymbetov.
Sonymen qatar, ministr jalpy qatysýshylar sanynyń qatarynda qaita oqytylǵandardyń joǵary úlesine nazar aýdardy. Máselen, 2017-2018 jyldary 109 myń adam oqýǵa jiberildi, onyń ishinde 1,8 myń adam eki nemese odan da kóp ret kýrstardan ótti.
«Soltústik Qazaqstan oblysynyń turǵyny eki jylda tórt ret, al Atyraý oblysynyń turǵyny bir jylda úsh ret oqytyldy. Taǵy bir suraq – biz kimdi oqytamyz jáne olar qalai jumysqa ornalasady? Orta eseppen respýblika boiynsha oqýdy aiaqtaǵandardyń 57%-y óz mamandyqtary boiynsha jumys isteidi. Sondyqtan, mamandyqtarǵa degen suranysty eskere otyryp, oqytýdy túzetý qajet», — dep tolyqtyrdy Eńbek ministrliginiń basshysy.
«Bastaý biznes» jobasynyń aiasynda 45 myńnan astam azamat kásipkerlik negizderin úirendi. 27 myńnan astam oqytylǵandar ózderiniń biznes jobalaryn qorǵady, biraq tek 8 myńy ǵana granttar men shaǵyn nesieler aldy. Eń tómengi kórsetkishter Almaty (2,3%), Shymkent (11,3%) qalalarynda jáne Túrkistan oblysynda (7,1%).
Óz isin ashýǵa arnalǵan memlekettik granttardyń iegerleri 11,2 myń adam boldy, onyń ishinde jastar – 6,8 myń adam, az qamtamasyz etilgender – 1,5 myń adam, kóp balaly otbasylar – 205 adam. Eń az granttar Nur-Sultan qalasynda berildi — jyldyq jospardyń 2,2% nemese 49. Osyǵan uqsas jaǵdai Almaty men Shymkent qalalarynda baiqalady.
Biyl 10,2 myń adamǵa jeńildetilgen mikrokreditter berildi, olardyń 80%-y mal sharýashylyǵyn damytýǵa baǵyttalǵan. Qosymsha 9 myń jumys orny quryldy. Mikrokredit berýdiń teris dinamikasy Shymkent qalasynda, Atyraý jáne Qostanai oblystarynda baiqalady.
|Biyl barlyǵy 334,7 myń adam jumysqa ornalastyryldy, onyń ishinde 240 myń adam turaqty jumys oryndaryna ornalasqan.
Sondai-aq, bul másele boiynsha ulttyq ekonomika, aýyl sharýashylyǵy, energetika, indýstriia jáne infraqurylymdyq damý vitse-ministrleri, sondai-aq Mańǵystaý, Túrkistan, Soltústik Qazaqstan, Aqtóbe, Shyǵys Qazaqstan, Qyzylorda, Almaty oblystary, Almaty jáne Shymkent qalalaryn ákimderiniń orynbasarlary baiandama jasady.
Esepterdi tyńdaǵannan keiin Premer-Ministrdiń orynbasary bólingen biýdjet qarajatynyń nashar igerilgenin atap ótip, baǵdarlamany sapasyz oryndaǵany úshin óńirlerdi synǵa aldy.
«Jetekshilik etetin ákim orynbasarlary tarapynan baqylaý joq. Osy jumysqa formaldy túrde qarańyzdar. Buǵan deiin aqsha joq degen shaǵymdar boldy. Al qazir aqsha bar, biraq nátije joq. Eńbek ministrligine bul jumysty kúndelikti baqylaýǵa alyp, ony júzege asyrýdyń tiimdiligine taldaý jasaý qajet. Jyl sońyna deiin az ǵana ýaqyt qaldy, sondyqtan el basshylyǵynyń tapsyrmalaryn sapaly oryndaý úshin bul jumysty jandandyrý qajet», - dep túiindedi B. Saparbaev.
Sonymen qatar, keńes barysynda 2019-2020 oqý jylyndaǵy orta bilim berýdiń negizgi baǵyttary qaraldy. Atap aitqanda, oqýshylardy ystyq tamaqpen qamtamasyz etý, tsifrlandyrý, MJÁ jobalaryn iske asyrý, tárbie jumystaryn júrgizý, quqyq buzýshylyqtar men sýitsidtiń aldyn-alý, balalardyń qosymsha bilim alýǵa tartylýyn arttyrý máseleleri talqylandy.
