30 jastan asqan stýdentter joǵary oqý oryndaryna bilim alýǵa emes, diplom úshin keledi. Mundai pikirdi QR Bilim jáne ǵylym vitse-ministri Miras Dáýlenov aitty, dep habarlaidy QazAqparat.
«Ótken jyly 30 myńnan astam stýdent bilim alyp jatqan bir joǵary oqý ornyn tekserdik. Onyń jabylatyndyǵy týraly jariialadyq. Osy oraida bizdiń sheshimimizge shaǵym túsirilip, sot otyrystary jarty jylǵa sozyldy. Bilim sapasynyń tómendigin jáne JOO-nyń jabylatynyn bile tura birde-bir stýdent basqa oqý ornyna aýystyrylmaǵan», - dedi M. Dáýlenov Ortalyq kommýnikatsiialar qyzmetinde.
Onyń aitýynsha, stýdentter kontingentiniń jartysynan astamy 30 jastan asqan adamdardy qamtityn JOO-lar da bar.
«Bul stýdentterdiń bilim úshin emes, diplom alýǵa kelgenin túsinip otyrmyz. 30 jastan asqan bul stýdentterde birinshi kýrstan bastap turaqty zeinetaqy aýdarymdary júrip jatqanyn atap ótken jón, iaǵni olar jumys istep júrgen adamdar. Nátijesinde, biz qandai mamandardy kóretinimiz belgili», - dedi Miras Dáýlenov.
Onyń sózine qaraǵanda, tekseris barysynda atalǵan stýdetterdiń saabaqtarǵa barmaityndyǵy anyqtaldy. Pandemiia kezinde de olar qashyqtan oqytý rejimindegi sabaqtarǵa qatyspaýda.
«Is júzinde bul stýdentter oqymai júrgenin kórip otyrmyz. Atap aitqanda, joǵary jastaǵy stýdentterdiń bilim alýyna eshqandai shekteý joq, olar emin-erkin bilimin jalǵastyra alady. Olar bilim alýǵa niet tanytsa, onda naqty sabaqtarda bolýy kerek», - dedi vitse ministr.
