Foto: Akorda.kz
Prezident Qasym-Jomart Toqaev Vetnam Premer-ministri Fam Min Chinmen kezdesti, dep habarlaidy "Ult aqparat" Aqordanyń resmi saityna silteme jasap.
Kezdesýde Memleket basshysy búgin Prezident Vo Vang Thyongpen nátijeli kelissóz júrgizgenin jáne onyń barysynda ekijaqty yntymaqtastyqtyń negizgi baǵyttary talqylanǵanyn atap ótti.
Qasym-Jomart Toqaevtyń aitýynsha, elimiz Vetnamdy Ońtústik Shyǵys Aziiadaǵy eń basty seriktesteriniń biri retinde qarastyrady. Prezident Hanoiǵa jasaǵan saparynyń nátijesin joǵary baǵalady.
– Búgin tańerteń Prezident Vo Van Thyongpen óte nátijeli kelissóz júrgizdim. Biz kóptegen saladaǵy qarym-qatynastarymyz ben yntymaqtastyǵymyzdy nyǵaitýǵa yqpal etetin óte mańyzdy ýaǵdalastyqtarǵa qol jetkizdik. Jan-jaqty yntymaqtastyǵymyzdyń negizgi baǵyttary aiqyndalǵan Birlesken kommiýnike qabyldadyq. Sondai-aq Vetnam kásipkerlerimen kezdesý ótkizdim. Olardyń Qazaqstan naryǵyndaǵy qyzmetin qoldaýǵa daiynmyn. Biz elimizde vetnamdyq biznestiń uzaq ýaqyt jumys isteýine shyn máninde múddeli bolǵandyqtan kómek kórsetemiz. Vetnam – ekonomikalyq ósim turǵysynan qarqyndy damyp kele jatqan el, – dedi Qasym-Jomart Toqaev.
Memleket basshysy búgin qol qoiylǵan Saýda-ekonomikalyq yntymaqtastyqty jedel damytý jónindegi úkimetaralyq birlesken is-qimyldar jospary saýda, investitsiia, tehnologiia, aýyl sharýashylyǵy, tranzit jáne týrizm siiaqty mańyzdy salalar boiynsha eki eldiń ózara bailanystaryn jandandyrýǵa yqpal etetin negizgi qujat bolatynyna senim bildirdi.
Óz kezeginde Vetnam Premer-ministri Fam Min Chin Qasym-Jomart Toqaevtyń sapary Qazaqstan men Vetnamnyń ekijaqty yntymaqtastyǵyna tyń serpin beretinin atap ótti.
- Eki tarap qol qoiǵan qujattar men kelisimder keleshekte yntymaqtastyǵymyzǵa berik negiz bolady. Sizben Qazaqstan men Vetnamnyń saiasat, diplomatiia, investitsiia jáne saýda salalaryndaǵy qarym-qatynasyn odan ári damytyp, tereńdetý joldaryn talqylaýǵa múddelimiz, - dedi Fam Min Chin.
