Bilim jáne ǵylym ministrligine veterinarlyq mamandyqtar boiynsha aýyldyq kvotany búgingi 30%-dan 70%-ǵa deiin ulǵaitý jóninde usynys engizildi. Bul týraly QR Aýyl sharýashylyǵy ministri Erbol Qarashókeev aitty, dep habarlaidy QazAqparat.
«2020-2021 oqý jylynda 1 283 veterinariia mamany (memlekettik tapsyrys boiynsha - 728, aqyly negizde - 551, kásiporyn esebinen - 4) shyǵaryldy, onyń ishinde áielder - 717 (55,8%). Jyl saiyn kadrlar daiarlaýǵa (veterinariia) 825 bilim berý granty bólinedi, 2021 jyly granttar sany 50-ge nemese 6,3%-ǵa artty. Mamandyǵy boiynsha jumysqa ornalastyrylǵandar – 712 nemese 55%, mamandyǵy boiynsha emester - 312 nemese 25%. Qalǵandary – 259-y nemese 20% túrli sebepter boiynsha jumysqa ornalaspaǵan (dekrettik demalys, shetelge ketip, magistratýraǵa jáne doktorantýraǵa tústi, «Jumyspen qamtý ortalyǵy» MM esebinde tur)», - dedi Qarashókeev.
Aýyldyq jerlerde veterinariialyq mamandardy ornyqtyrý jáne jumysqa ornalastyrý máselesin sheshý úshin kelesi jumystar júrgizilýde:
1. Bilim jáne ǵylym ministrligine veterinarlyq mamandyqtar boiynsha aýyldyq kvotany búgingi 30%-dan 70%-ǵa deiin ulǵaitý jóninde usynys engizildi.
2. Oqý oryndaryna oqýǵa qabyldaý kezinde yntalandyrylǵan talapkerlerge basymdyq berý usynylady.
3. Ulttyq ekonomika ministrligine «Diplommen aýylǵa» baǵdarlamasy aiasynda veterinarlarǵa kóterme járdemaqy mólsherin 20%-ǵa arttyrý týraly usynys daiyndalýda.
«Joǵaryda kórsetilgen sharalardy iske asyrý bilim berý protsesiniń sapasyn arttyrýǵa múmkindik beredi jáne veterinariia salasy úshin joǵary bilikti kadrlar daiarlaý úshin negiz qalaidy. Dúniejúzilik janýarlar densaýlyǵy uiymynyń Jerústi janýarlarynyń densaýlyǵy kodeksiniń usynymdaryna sáikes, ózin-ózi retteitin qoǵamdyq uiym - veterinarlyq statýarlyq organdy qurý jáne onyń jumys isteýi boiynsha jumys júrgizý usynylady», - dedi ministr.
Ol mynadai fýnktsiialardy júzege asyrýǵa arnalǵan:
- veterinariialyq mamandardyń qyzmetin olardy esepke alý jáne tirkeý arqyly retteý;
- veterinarlyq mamandardy daiarlaý úshin veterinarlyq ýniversitetter men basqa da veterinarlyq oqý oryndary ustanýǵa tiisti standarttardy ázirleýge qatysý;
- veterinariialyq mamandardy oqytýdy jáne olardyń biliktiligin arttyrýdy uiymdastyrý;
«Joǵaryda atalǵan barlyq máseleler qazirgi ýaqytta ázirlenip jatqan «Veterinariia týraly» Zańǵa ózgerister men tolyqtyrýlar engizý jónindegi zań jobasynda kórinis tabatynyn atap ótkim keledi. Ony Parlamentke biylǵy jyldyń 3-toqsanynda engizýdi josparlap otyrmyz», - dedi vedomstvo basshysy.
