Men, Vening Marina Ivanovna - nemis ultynyń qyzymyn. Qazaqstan azamatshasy bolǵandyqtan, ózimniń qazaqsha sóileitinime tańyrqaýǵa negiz joq dep esepteimin. Sebebi, búgingi tańda memlekettik til máselesi óte ózekti. Qazaqstannyń árbir azamaty memlekettik tildi, iaǵni qazaq tilin bilýi qajet.
2020 jyldyń 25 maýsymynda Qazaqstan Respýblikasynyń Prezidenti Qasym-Jomart Toqaev respýblikalyq «Ana tili» gazetine bergen suhbatynda «Biz ózge ult ókilderin qoldaýymyz kerek. Mundai azamattar qazaq tiliniń deńgeiin ultaralyq qoldanys dárejesine kóterýge kómektesedi» degen bolatyn. Men, Prezidentimizdiń bul pikirimen tolyqtai kelisemin. Óitkeni ózge ult ókilderi qazaq tiline naǵyz janashyr jandar. Olar qazaq tilin nasihattap, túrli is sharalarǵa qatysýdan basqa, kúndelikti ómirde de qazaq tilinde sóileidi. Tipti, keibir ózge ultty qurbylarym qazaq tilinde maqaldatyp, mándi sóilegende, talai qazaqty shań qaptyrady.
Men úshin qazaq tili - tek jumys quraly ǵana emes. Qazaq tilin bilgenimniń arqasynda birshama jetistikterge jettim dep maqtanyshpen aita alamyn. «Bilerim - bir toǵyz, bilmeitinim- toqsan toǵyz» demekshi, bilgen saiyn bilmeitinin kóp ekenin uǵa túsesiń. Sondyqtan da shyǵar belesterim áli alda.
Memleket basshysy aitqandai: «Qazir toi qýalaityn emes, oi qýalaityn kezeńmen betpe-bet keldik. Bul dáýir - aqyl-oidyń, ǵylym men bilimniń, eńbektiń dáýiri». Demek, memlekettik tildi meńgerýdi árkim ózinen bastaýy tiis.
Vening Marina
Esim Shaikin atyndaǵy orta mektep,
Shal aqyn aýdany
