QR Premer-Ministriniń orynbasary Roman Skliardyń basshylyǵymen «Basqarý organdarynyń, Azamattyq qorǵanys Memlekettik júiesiniń kúshteri men quraldarynyń sý tasqyny kezeńine daiyndyǵy týraly» kún tártibimen tótenshe jaǵdailardyń aldyn alý jáne olardy joiý jónindegi Vedomstvoaralyq memlekettik komissiianyń otyrysy ótti, dep jazady primeminister.kz.
QR IIM TJK daǵdarys jaǵdaiyndaǵy Basqarý ortalyǵynda ótkizilgen otyrysqa ortalyq memlekettik jáne jergilikti atqarýshy organdardyń basshylary qatysty.
«Qazgidromet» RMK, TJ Komiteti, Sý resýrstary komitetiniń basshylary boljamdar, sý tasqyny kezeńine daiyndyq, gidrotehnikalyq qurylystardyń sýdy qabyldaý jáne apatsyz ótkizýge tehnikalyq daiyndyǵy týraly baiandady.
«2017-2020 jyldarǵa arnalǵan sý tasqyny qateriniń aldyn alý jáne joiý boiynsha sharalar kesheni» jol kartasynyń is-sharalaryn iske asyrý kezinde 724 eldi mekenge qaýip-qaterler azaitylǵany atap ótildi. 2017-2019 jyldar aralyǵynda 515 km qorǵaý bógetteri men qorǵanys bilikteri salyndy, 508,1 km qorǵaý qurylystary jóndeldi, 537,1 km sý tasqyny qaýpi bar ózen arnalaryndaǵy jaǵalaýdy bekitý, túbin tereńdetý jáne túzetý boiynsha jumystar júrgizildi.
Sý tasqyny jaǵdaiynyń kúrdelený yqtimalynyń aldyn alý úshin 9 myńnan astam adam, 1730 birlik tehnikadan turatyn apattyq-qutqarý bólimsheleriniń kúshteri men quraldarynyń toby quryldy. Kúshter men quraldardyń qosymsha rezervtik toptary, Ulttyq ulannyń áskeri qyzmetkerleri men tehnikasy daiyndaldy. Halyqty habardar etý máseleleri pysyqtaldy.
Sý tasqyny kezeńiniń qaýipsiz ótýi boiynsha atqarylyp jatqan is-sharalar týraly Nur-Sultan q., Aqmola, Shyǵys Qazaqstan, Soltústik Qazaqstan, Qaraǵandy, Qostanai, Pavlodar oblystary ákimderiniń orynbasarlary tyńdaldy.
Premer-Ministrdiń orynbasary Roman Skliar sý tasqynyna jol bermeý úshin aldyn ala sharalar qabyldaý jóninde birqatar naqty tapsyrmalar berdi.
