Búgin Premer-Ministrdiń orynbasary Eraly Toǵjanovtyń tóraǵalyǵymen QR aýmaǵynda koronavirýs infektsiiasynyń taralýyna jol bermeý jónindegi vedomstvoaralyq komissiianyń otyrysy ótti, dep habarlaidy "Ult aqparat".
Jiynda Densaýlyq saqtaý ministri Aleksei Tsoi eldegi sanitariialyq-epidemiologiialyq jaǵdai týraly baiandama jasady. Onyń aitýynsha, sońǵy eki aptada COVID-19-ben aýyrý deńgeii 30%-ǵa, ólim-jitim 40%-ǵa tómendegen.
VAK otyrysynda birqatar mańyzdy sheshim qabyldandy:
1. COVID-19-ǵa qarsy ujymdyq immýnitetti qalyptastyrý maqsatynda vaktsinalanýǵa tiis kontingent 9,9 millionnan 11,4 million adamǵa deiin ulǵaityldy, bul DDSU usynymdaryna sáikes ujymdyq immýnitetke 60% deńgeiinde qol jetkizýge múmkindik beredi;
2. halyqty qaita vaktsinalaýdy biylǵy qarashanyń úshinshi onkúndiginen kelesi sanattaǵy adamdar úshin bastaý josparlanyp otyr: táýekel toptary (meditsina qyzmetkerleri, pedagogter, meditsinalyq-áleýmettik mekemeler men jabyq mekemelerdiń personaly men kontingenti, kúsh qurylymdarynyń qyzmetkerleri), 60 jastan asqan adamdar, ózdiginen zertteýlerden ótken jáne KVI-ǵa qarsy antidenelerge teris test nátijesi bar adamdar;
3. "ASHYQ" jobasyna qatysatyn kásipkerlik nysandarynyń jumys ýaqyty ulǵaidy, "jasyl aimaqta" – saǵat 03:00-ge deiin, "ASHYQ" jobasynyń kóshbasshylary úshin – saǵat 05:00-ge deiin; "sary aimaqta" – saǵat 01:00-ge deiin, "ASHYQ" jobasynyń kóshbasshylary úshin – saǵat 03:00-ge deiin;
4. Úndistan jáne Filippinmen ózara vaktsinalaý tólqujatyn taný jumystary júrgizildi, nátijesinde Qazaqstan 15 elmen vaktsinalaý pasportyn taný týraly kelisimge qol jetkizdi (Túrkiia, Vengriia, Grýziia, Qyrǵyzstan, Moldova, Mońǵoliia, Tailand, Belarýs, Armeniia, Iran, San-Marino, Argentina, Estoniia, Úndistan jáne Filippin);
5. karantin shekteýleri kezeńinde memlekettik shekarany kesip ótý tártibine Qazaqstan aýmaǵyna erkin kirý (VAK sheshiminsiz) bóliginde ózgerister engizildi:
- týystyq faktisin rastai otyryp, Qazaqstan azamattarynyń týysy bolyp keletin sheteldikterge;
- Qazaqstan azamattarynyń otbasy músheleri sanalatyn sheteldikterge aýyr naýqastanǵandarǵa kútim jasaý úshin, olardyń ilesip júretin jubailary men kámeletke tolmaǵan balalaryna, sondai-aq jerleý rásimine kelgenderge.
Premer-ministrdiń orynbasary Eraly Toǵjanov vedomstvoaralyq komissiianyń otyrysyn qorytyndylai kele, birqatar naqty tapsyrma berdi.
