QR Premer-Ministriniń orynbasary Eraly Toǵjanovtyń tóraǵalyǵymen vedomstvoaralyq komissiia epidemiologiialyq jaǵdaidy odan ári turaqtandyrý jáne karantindik sharalardy kezeń-kezeńimen alyp tastaýǵa daiyndyq jónindegi sharalar keshenin qarady. Bul týraly "Ult aqparat" primeminister.kz silteme jasap habarlaidy.
Densaýlyq saqtaý ministrliginiń ókilderi jáne bas memlekettik dáriger epidemiologiialyq jaǵdaidy turaqtandyrý kórsetkishteri jáne kúsheitilgen sanitarlyq-dezinfektsiialyq rejimde karantin sharalaryn jeńildetýdiń yqtimal joldary týraly baiandady. Sonymen qatar aýrýdyń ósýine jol bermeý maqsatynda óńirlerdiń jumysyn baqylaý úshin birqatar jańa indikatorlar usynyldy.
E. Toǵjanov Densaýlyq saqtaý ministrligi men óńirlerdiń basshylaryna epidemiologiialyq jaǵdaidy qatań baqylaýda ustaýdy jáne syrqattanýshylyq kórsetkishin odan ári tómendetýdi qamtamasyz etýdi tapsyrdy. Sondai-aq, vitse-premer óńir basshylaryna COVID-19-pen kúresýde zardap shekken meditsina qyzmetkerlerine ótemaqynyń ýaqtyly tólenbeýi týraly ár fakti boiynsha sharalar qabyldaýdy tapsyrdy.
«Óńirler monitoringtik toptardyń jumysynyń tiimdiligin arttyrýy kerek. Qajettinshe, jaǵdaidy odan ári jaqsartý úshin vedomstvolar men jergilikti bilik jelisi boiynsha qosymsha sharalardy pysyqtaý kerek. Turǵyndarmen aldyn alý jumystaryna, birinshi kezekte, maska rejimin jáne áleýmettik qashyqtyqty saqtaýǵa erekshe kúsh-jiger jumsaý qajet», - dep atap ótti E. Toǵjanov.
Eske salsaq, búgin Úkimet otyrysynda Premer-Ministr Asqar Mamin karantin sharalaryn alyp tastaý josparyn memlekettik komissiia qaraýyna engizýdi tapsyrdy.
