DDSU sarapshylarynyń Ýhandaǵy virýsologiia institýtyna barǵan sáti. 3 aqpan 2021 jyl.
Seisenbi kúni Amerikanyń resmi tulǵalary halyqaralyq komissiia koronavirýstyń paida bolýyn zerttegen kezde Qytai qajetti dárejede ashyqtyq tanytpady dep málimdedi.
"Nátijesi qandai bolmasyn, báribir oqiǵanyń túp-tamyryna jetýge tiispiz. Bizge Qytaidyń tolyq ashyq bolǵany kerek. Bul turǵyda DDSU-nyń kómegine zárýmiz, qazir ondai kómekti sezinip otyrǵan joqpyz" dedi Aq úi keńesshisi Endi Slavitt.
Resmi málimet boiynsha, koronavirýs adamǵa jabaiy janýar etinen juqqan. Al janýar virýsty jarqanattan juqtyrǵan.
Virýs Ýhandaǵy virýsologiia institýtynda zerttelip, abaisyzda tarap ketti degen alǵashqy boljamdy sarapshylardyń basym bóligi joqqa shyǵarǵan. Biyl jyl basynda Ýhanǵa barǵan Dúniejúzilik densaýlyq saqtaý uiymynyń sarapshylary da virýs janýardan adamǵa juǵýy múmkin degen boljamnyń shyndyqqa kóbirek janasatynyn aitqan.
Degenmen byltyr kúzde AQSh memlekettik departamenti koronavirýstyń shyǵý tegin óz betinshe zerttei bastaǵan. CNN arnasynyń habarlaýynsha, AQSh memlekettik departamenti virýsologiia institýty men Qytai armiiasy arasyndaǵy bailanysqa erekshe nazar aýdarǵan. Biraq zertteýdiń aldyn ala qorytyndysyna kúmán keltirgen Djo Baiden ákimshiligi ony japqan.
Jeksenbi kúni Wall Street Journal basylymy amerika barlaý qyzmetiniń aqparatyn jariialady. Onda 2019 jyly qarasha aiynda koronavirýs belgileri boiynsha aýrýhanaǵa túsken Ýhandaǵy institýt qyzmetkerleri jaily sóz bolady. Al Pekin virýs eń alǵash ret 2019 jyly jeltoqsannyń sońynda belgili boldy dep málimdegen.
Aq úidiń meditsina máseleleri boiynsha keńesshisi Entoni Faýchi virýs janýardan adamǵa juqqan bolýy múmkin degen boljamnyń jany bar, biraq zertteý júrgizilýi tiis dep málimdedi.
