Profilaktikalyq meditsina akademiiasynyń prezidenti, Amerika densaýlyq saqtaý qaýymdastyǵynyń múshesi Almaz Sharman vaktsinatsiiadan keiingi janama áserlerden qorqý naizaǵaidan qorqyp, jaýyndy kúni kóshege shyqpaýmen birdei áreket degen oi aitty, dep habarlaidy QazAqparat.
«Koronavirýs búginde aldyn alýǵa bolatyn aýrý. Vaktsina 100 paiyz bolmasa da, koronavirýs infektsiiasynan, syrqattyń aýyr ótýinen qorǵaidy. Búginde álemde túrli vaktsinalardyń 4 mlrd dozasy egildi. Árine, vaktsinanyń ózi virýs týdyrmaidy jáne vaktsina alǵandar is júzinde kovidten ólmeidi. Vaktsinany 100 paiyz qaýipsiz dep te aita almaimyz. Óte sirek jaǵdailarda olar allergiialyq reaktsiia nemese qannyń uiýy siiaqty janama áserlerdi týdyrýy múmkin. Mundai reaktsiialar vaktsina alǵan 50 myń adamnyń bireýinde ǵana kezdesedi. Bul yqtimaldylyqty naizaǵai túsýi yqtimaldyǵymen salystyrýǵa bolady. Bul óte sirek kezdesedi», - dep túsindirdi sarapshy.
Sonymen qatar, ol vaktsina almaǵan ár besinshi adam qan uiý qaýpine shaldyǵatynyn aitty.
«Bul qaýiptiń yqtimaldyǵy vaktsina alǵannan keiingi yqtimaldyqtan myń ese joǵary. Vaktsinalar jańa týǵan nárestelerde reprodýktivtik aýytqýlar men deformatsiialardyń damýyna ákelmeidi. Kerisinshe, kovidpen aýyratyndar bedeýliktiń, shala týylýdyń, sondai-aq midyń, júrektiń, basqa organdardyń sozylmaly syrqatynyń, onyń ishinde aqyl-oi qabiletiniń tómendeýiniń úlken qaýpine ushyraidy», - dedi Almaz Sharman.
