Elordanyń Qoǵamdyq densaýlyq saqtaý basqarmasy basshysynyń orynbasary Áliia Rústemova vaktsinalardy tasymaldaý jáne saqtaý erejelerin baiandady, dep habarlaidy QazAqparat.
Onyń aitýynsha, basqarma qoimasynda bir ýaqytta 200 myńǵa jýyq vaktsina dozasyn saqtaýǵa bolatyn tórt muzdatqysh qondyrǵy bar.
«Vaktsinanyń ózi SQ-Farmatsiia habynan avtorefrijeratorlarda minýs 18-20 gradýsta jetkiziledi. Jetkizýdiń barlyq kezeńderinde sýyq temperatýra saqtalady. Ári qarai, osy vaktsinalardy barlyq standarttarǵa sáikes qoimaǵa qabyldaimyz. Alǵashqy meditsinalyq-sanitariialyq kómek uiymdaryna vaktsina termokonteinerlerde jetkiziledi, olarda termotirkegishter nemese termoindikatorlar bolady. Solar arqyly tasymaldaýdyń barlyq kezeńderinde temperatýralyq rejimniń saqtalýyn tekseremiz», - dep túsindirdi spiker Nur-Sultan qalasynyń ákimdiginde ótken onlain brifirngide.
Árbir meditsinalyq uiymda vaktsinanyń saqtalýy men tasymaldanýyna jaýap beretin, arnaiy oqytýdan ótken meditsina qyzmetkeri bekitilgen.
«Olar táýligine eki ret – tańerteń jáne keshke tońazytqysh jabdyǵynyń temperatýrasyn tekseredi jáne munyń barlyǵy temperatýrany esepke alý jýrnalyna jazylady. Eger termodatchikter tasymaldaý sharttary buzylǵanyn anyqtasa, naqty sharalar qabyldanatyn bolady», - deidi Á. Rústemova.
