Foto: primeminister.kz
Jeltoqsanda qyzylshaǵa qarsy 1 mln doza vaktsina jetkiziledi. Bul týraly Densaýlyq saqtaý ministri Ajar Ǵiniiat málim etti, dep habarlaidy Kazinform agenttigi.
«Qyzylsha boiynsha jaǵdaidy turaqtandyrý maqsatynda sharalar qabyldandy. Birinshiden, qyzylshaǵa qarsy josparly vaktsinatsiialaýmen 600 myńnan astam bala qamtyldy. Bul 1 jas jáne 6 jas aralyǵyndaǵy balalardyń 84 paiyzyn quraidy. Jyl sońyna deiin osy jas tobyndaǵy 100 myńnan astam bala vaktsinatsiialaýǵa jatady», - dedi ministr Ortalyq kommýnikatsiialar qyzmetindegi brifingte.
Onyń atap ótýinshe, ekinshiden, qyzylshamen aýyrǵandarmen bailanysta bolǵan 15 myńnan astam adam shuǵyl vaktsinatsiialaýmen qamtyldy. Úshinshiden, buryn vaktsina almaǵan 18 jasqa deiingi 63 myńnan astam adam vaktsina aldy. Tórtinshiden, 5 jasqa deiingi balalardy immýndaý júrgizilip jatyr. Osy ýaqytqa deiin 100 myńnan astam bala vaktsinatsiialandy.
«Qosymsha jappai immýndaý júrgizý úshin qyzylshaǵa qarsy vaktsinanyń 1,5 mln dozasy satyp alyndy. Onyń 500 myń dozasy kelip tústi, jeltoqsan aiynda 1 mln doza jetkiziledi dep kútilýde. Osyǵan bailanysty, halyqtyń belsendiligi men vaktsinatsiialaýdy tańdaý bizdiń balalarymyzdyń densaýlyǵyn saqtaýdy qamtamasyz etýge múmkindik beredi», - dedi ol.
Ministrdiń aitýynsha, jappai immýndaýmen joǵary qamtý ǵana jeltoqsan aiynda qyzylsha boiynsha epidemiologiialyq jaǵdaidy turaqtandyrýǵa jáne 2024 jylǵy qańtarda syrqattanýshylyqty azaitýǵa múmkindik beredi.
«Vaktsinamen basqarylatyn aýrýlar men asqynýlardan balalardyń densaýlyǵyn qorǵaý týraly sheshim qabyldaityn ata-analardan vaktsinatsiialaýdan bas tartý kókjótel, difteriia, poliomielit, sirespe siiaqty umytylyp ketken qaýipti aýrýlardyń órshýine ákelýi múmkin ekenine, bul kóbine joǵary múgedektik pen ólimge ákeletinine asa nazar aýdarýyn ótinemin. Eger sizderdiń 5 jasqa deiingi balalaryńyz bolsa, Ulttyq egý kúntizbesine sáikes balalaryńyzda ekpelerdiń bar-joǵyn tekserýdi suraimyn jáne mindetti túrde qosymsha jappai immýndaý aiasynda ekpe alýdy umytpańyz. Vaktsinatsiialanbaǵan jaǵdaida balalaryńyzdy tirkelgen jeri boiynsha meditsinalyq uiymda dereý vaktsina alýdy usynamyn. Balalaryńyzdyń densaýlyǵy - óz qoldaryńyzda», - dedi Ajar Ǵiniiat.
