Almatyda koronavirýs vaktsinasyn saldyrý úshin turǵylyqty jeri boiynsha tirkelý talap etile me? Bul saýalǵa onlain brifing barysynda qalalyq qoǵamdyq densaýlyq saqtaý basqarmasynyń bastyǵy Nariman Tabynbaev jaýap berdi, dep habarlaidy QazAqparat.
Onyń aitýynsha, almatylyqtardyń basym bóligi vaktsinany tirkelgen emhanalarynda saldyrady.
«Eger ol Almaty qalasynyń turǵyny bolsa jáne jumys orny boiynsha jaqyn klinikaǵa júginse, onda odan eshkim bas tartpaidy. Bizde qalaǵa kelip, osynda jumys isteitin adamdar bar. Mysaly, Almatyda jumys isteitin meditsina qyzmetkerleriniń 30% - qala syrtynan keletinder. Qalalyq densaýlyq saqtaý basqarmasy meditsinalyq mekemelerge jumys ornynda vaktsina egýge ruqsat berdi. Almatyda turatyndardyń barlyǵyna ekpe qoljetimdi. Eger olar tirkelgen emhanasynda saldyrǵysy kelse, jazylyp, kezekke tura alady», - dedi ol.
