Nur-Sultan qalasynyń Kópbeiindi meditsinalyq ortalyǵy direktorynyń orynbasary Sáýle Atyǵaeva indetpen kúreske kirisken 15 aida ózi sezingen emotsiialar týraly baiandady, dep habarlaidy QazAqparat.
«Meniń koronavirýsqa arnalǵan gospitalde jumys istep júrgenime 15 ai boldy. Myńdaǵan adamdy emdep shyǵardyq. Ókinishke qarai, joǵaltqan adamdar da kóp. Olardyń arasynda dáriger áriptesterimiz de, týysqandarymyz da bar. Sáýir aiynda syrqattanýdyń erekshe óskenin baiqaǵanymyzdy aitqym keledi. Qańtar aiyna qaraǵanda aýrý juqtyrý kórsetkishi 3-4 esege artty. Ólim kórsetkishi 5 esedei ósti. Qańtarda 22 adam qaitys bolsa, sáýirde 104 adam kóz jumdy. Onyń bári bireýdiń ata-anasy, bireýdiń jaqyn týysy, bireýdiń dosy, áriptesi», - deidi infektsionsit.
Ortalyq ókili koronavirýstan kóz jumǵan adamdardyń týystary kóbinese vaktsina nege erte shyqpady dep ókinetinin aitady.
«Qaitys bolǵan adamnyń súiegin áketýge kelgen adamdardy kórý bizge óte aýyr. Sol adamdardyń aýzynan «Átteń, vaktsina nege erterek paida bolmady eken? Vaktsina bolyp, ata-anamyzǵa ekpe jasatqanda qazir aman-esen telefonmen sóilesip otyratyn edik. Búgin olardy ziratqa emes, saiahatqa apara jatatyn edik» degen ókinishterdi jii estimiz», - deidi maman.
Ol, sondai-aq, ár naýqasty emdeý el ekonomikasyna da salmaq salyp jatqanyn eskertti
«Qazir árkimniń aldynda tańdaý tur. Ne aýyryp emdelý, ne aýyrmai ekpe alý kerek. Aýrýdy juqtyrý ońai bolǵanymen, odan emdelý ońai emes. Statsionarǵa túskennen keiin qulan taza aiyǵyp shyǵýdyń ózi qiyn sharýa. Ár naýqasty emdep shyǵýdyń quny da qymbatqa túsip jatyr. Kóptegen qan taldaýlaryn jasaýǵa májbúrmiz. Óitkeni bul virýs burynǵylardan múlde bólek», - degen infektsionist postkovidtik sindromdardyń qanshalyqty qaýipti ekenine toqtaldy.
«Bul virýs adam denesindegi kóptegen organdardy zaqymdaidy. Áýeli ókpeni, odan keiin júrekti, asqazan men ótti zaqymdaidy. Kóptegen naýqas ómirinde alǵash ret qant diabetine shaldyǵyp jatyr. Mi da, búirek pen qantamyrlar qatty shabýylǵa ushyraidy. Tipti jolyńyz bolyp, em tiimdi júrip, aǵzańyz qarsy turyp jazylyp shyqtym degenniń ózinde qalypty ómirge orala almaýyńyz múmkin. Óitkeni «poskovid sindromy» degen túsinik bar. 2 aptadan keiin, keide tipti 3 aidan keiin qiyndyqtar týyp, júrek, mi, búirek, baýyr siiaqty organdar syr berýi múmkin. Aýrýdan keiin múgedek bolyp qalýdyń qaýpi joǵary. Al jolyńyz bolmasa, jan tapsyrýyńyz da múmkin.
Sondyqtan aýrýdyń aldyn alýdyń qamyn oilaý kerek. Iá, ókinishke qarai aýrýdyń betin qaitaratyn quralymyz az shyǵar. Sonyń ishindegi er qoljetimdi ári tiimdi joly –vaktsina», - dedi Sáýle Atyǵaeva
Nur-Sultan qalasy ákiminiń orynbasary Baqtiiar Mákenniń aitýynsha, sáýir aiynyń basynan beri elordada 100 myńnan astam adam vaktsina alyp úlgergen.
