QR DSM sanitarlyq-epidemiologiialyq baqylaý komitetiniń tóraǵasy Aijan Esmaǵambetova maska taǵyp júrýdiń áli de ózekti ekenin eske saldy, dep habarlaidy QazAqparat.
«Maska taǵý qazirgi jaǵdaida ǵana emes, pandemiia jariialanǵannan sátten beri ózekti. Vaktsina aldyq, endi maska taǵýdyń, qashyqtyq saqtaýdyń qajeti joq dep oilaityndar qatelesedi. Ázirge ujymdyq immýnitet qalyptasqan joq, virýs qoǵamda joǵary deńgeide taralyp jatyr, ókinishke orai, vaktsina alǵandar da aýyryp qalýy múmkin», - dep atap ótti Aijan Esmaǵambetova Ortalyq kommýnikatsiialar qyzmetinde ótken brifingte.
Sondyqtan, onyń aitýynsha, vaktsinamen qatar aldyn alý sharalaryn da saqtaý mańyzdy.
«Ózińiz týraly, jaqyndaryńyz ben qart týystaryńyz týraly oilanyńyz. Delta shtamynyń da áldeqaida juqpaly, kóp adamǵa tez taralatynyn jáne aýrý kúrdeli jaǵdaida ótetinin este saqtańyz. Qurmetti qazaqstandyqtar, ótinemiz, barlyq aldyn alý sharalaryn saqtańyzdar», - dedi A. Esmaǵambetova.
