Shekaradan ótetin Qazaqstan jáne shetel azamattaryna arnalǵan karantin talaptary túsindirildi, dep habarlaidy QazAqparat.
«QR memlekettik bas sanitar dárigeriniń qaýlysyna sáikes, Qazaqstanǵa syrttan kelgen shekaradan ótken árbir azamat mindetti túrde PTR test anyqtamasy talap etiledi. Anyqtamanyń jaramdy merzimi 3 kún jáne 5 jasqa deiingi balalardan PTR test anyqtamasy talap etilmeidi. Atalǵan talap vaktsina alǵan azamattarǵa da qatysty, iaǵni olarda koronavirýsty anyqtaityn PTR testti tapsyrýǵa mindetti. Sonymen qatar PTR test anyqtamasy mindetti túrde 3 tilde (qazaq, orys, aǵylshyn) bolýy tiis», - dedi QR Densaýlyq saqtaý ministrligi kóliktegi sanitarlyq-epidemiologiialyq baqylaý departamentiniń sanitarlyq-karantin pýnktileriniń basshysy Dáriia Ázimbaeva.
Onyń aitýynsha, indettiń aldyn alý jáne taratpaý maqsatynda shetelden kelgen azamattar arasynda COVID-19-ǵa qatysty saýalnama júrgizeledi.
«Sondai-aq, el shekarasynan ótken jolaýshynyń qolynda PTR anyqtamasy bola turyp, sol sátte dene qyzýy nemese qandai bir álsizdiktiń belgisi baiqalsa ol azamat oqshaýlanýǵa jiberiledi. Bul saqtyq sharasy bolyp tabylady. Odan bólek, syrttan kelýshiler men el azamat taryn aqparattandyrý maqsatynda KVI, vaktsina, jalpy virýstan saqtaný týraly túsindirme jumystary uiymdastyrylady», - dedi ol.
Aita keteiik, Dáriia Ázimbaeva joǵarydaǵy málimetti QR Ulttyq qaýipsizdik komitetiniń shekara qyzmeti uiymdastyrǵan memlekettik shekarany kesip ótý máselelerine arnalǵan onlain baspasóz máslihaty barysynda bólisti.
