«Vaktsina saldyrǵan adam eki jyldan keiin qaitys bolady» degen aqparat jalǵan. Bul týraly QR DSM Qoǵamdyq densaýlyq saqtaý ulttyq ortalyǵy «Sanitarlyq-epidemiologiialyq saraptama jáne monitoring ǵylymi-praktikalyq ortalyǵy» filialy direktorynyń orynbasary m.a. Manar Smaǵul aitty, dep habarlaidy QazAqparat.
«Halyq arasynda vaktsina saldyrǵan soń, adam eki jyldan keiin qaitys bolady eken degen habar tarap jatyr. Ǵalamtordaǵynyń bári tekserilgen aqparat emes, degemen kóp adam oǵan senip qalady. Osy jóninde maman retinde ne aitasyz?», - degen suraq qoiyldy Ortalyq kommýnikatsiialar qyzmetinde.
«Munyń feik ekenin aityp jatyrmyz. Osyndai jalǵan aqparattyń kóp taralýynan vaktsinalaý týraly áli oilanyp júrgender kóp. Sol oilanyp júrgen adamdarǵa osyndai jalǵan aqparat taralýda. Jalpy vaktsinalaýdy densaýlyq saqtaý salasynda birinshi jyl qoldanyp jatqan joqpyz. Ózderińiz bilesizder, balalar arasynda qyzylshaǵa, qyzamyqqa qarsy, pnevmokokk juqpasyna qarsy vaktsinalaý júredi. Onyń tiimdiligi búgingi kúni dáleldengen. Ásirese sal aýrýyn alyp qarasaq, vaktsinalaý arqasynda dúniejúzinde sal aýrýy tirkeletin úsh-aq aimaq bar», - dep atap ótti maman.
Al koronavirýske qarsy vaktsinanyń qoldanylyp jatqanyna jarty jyldan endi ǵana asty. Byltyrǵy jeltoqsan aiynan bastap Izrail, AQSh elderinde qoldanyla bastady.
«Sondyqtan, eki jyldan keiin adam óledi degeni – naǵyz feik. Búginde mysaly naqty derekter joq, qaitadan revaktsinalaý júrgizý kerek pe, joq pa, munyń bári áli zerttelip jatyr. Sondyqtan, tolyqqandy feik dep aitýǵa bolady. Oǵan da taǵy bir dáleli – vaktsina alǵandar arasynda aýyrǵan adamdar sany óte tómen. Ol da vaktsinalaýdyń, aýrýdyń aldyn alýdyń tiimdiligin kórsetedi.
Iaǵni, bul feikke qarama-qarsy aitarym – koronavirýs juqtyrǵannan keiin 1-2 aptada ólip ketý qaýpi joǵary. Sol sebepti ár adam oilanyp, derekti aqparatty oqyp, sheshim qabyldaǵany jón dep oilaimyn», - deidi Manar Smaǵul.
