Búginde elorda jurtshylyǵy koronavirýs indetine qarsy jappai vaktsina alyp jatyr. Degenmen, halyq arasynda ekpege qatysty túrli alyp-qashpa áńgime de joq emes. Osy oraida COVID-19 indetiniń aldyn alý jáne onymen kúresýdiń birden-bir joly vaktsina alýdyń mańyzy týraly elordalyq jalpy tájiribe dárigeri, Nur-Sultan qalasy №11 emhananyń bólim meńgerýshisi Aidana Aiazbekqyzy aityp berdi, dep habarlaidy QazAqparat.
«Vaktsina adamdy indetten qorǵaýda 90% kepildik beredi, qalǵany ár adamnyń aǵzasyna bailanysty. Halyq arasynda jii kezdesetin qatelikterdiń biri - «vaktsina aldym» deidi de, sol sátten bastap maska taqpai, araqashyqtyqty saqtamai, toi-jiynǵa baryp júre beredi. Vaktsinany tolyqtai alǵannyń ózinde antidene 2 aiǵa deiin saqtalady. Osyny umytpaǵan jón. Iaǵni, indetke shaldyqpaý nemese odan qorǵaný vaktsina alýmen ǵana shektelmeidi», - dedi Aidana Aiazbekqyzy.
Sondai-aq, maman vaktsina alyp, koronavirýsqa qaita shaldyqqandarǵa qatysty pikir bildirdi.
«Iá, ekpe alǵanyna qaramastan atalǵan indetke qaita shaldyǵyp jatqandar bar. Halyq arasynda «ekpe aldym, bitti, endi eshqashan aýyrmaimyn» degen jańsaq pikir bar, odan aýlaq bolaiyq. Densaýlyq pen aǵzanyń saýlyǵy tek vaktsina alýmen shektelmeidi. Vaktsina - densaýlyq pen aǵzanyń saýlyǵyn saqtaýdyń bir joly ǵana. Mysaly, bizde tolyqtai vaktsina alyp, kovid dertine qaita ushyraǵan patsientter boldy, biraq olar eshqandai simptomsyz, ÓJJ kómeginsiz óz kúshimen kúresip shyqty. Bul vaktsina alýynyń arqasynda. Bas-aiaǵy 5 kúnniń ishinde tolyqtai jazyldy», - deidi ol.
