Búgin ál-Farabi atyndaǵy QazUÝ-dyń oqytýshy-professorlyq quramy men qyzmetkerleri «Spýtnik V» ekpesin qabyldai bastady, dep habarlaidy "Ult aqparat" atalǵan JOO baspasóz qyzmetine silteme jasap.
Eń alǵash bolyp ekpe qabyldaǵan ál-Farabi atyndaǵy QazUÝ Túlekteri qaýymdastyǵynyń atqarýshy direktory Kúlǵazira Baltabaeva: «Ekpe saldyrý týraly habarlamany oqydym da esh oilanbastan meni tizimge qosýyn suradym. Óitkeni, bul derttiń aldyn alý úshin óte qajetti qadam. Sońǵy ret tumaýǵa qarsy ekpe qabyldadym jáne búginge deiin bul aýrýǵa shaldyqpadym. Qazir de ekpege degen senimim mol. Ózim úshin ǵana emes, jaqyndarym úshin de bul óte mańyzdy sheshim» deidi.
Meditsina ǵylymdarynyń doktory, professor, QR jaratylystaný ǵylymdary akademiiasynyń akademigi Qanatbek Muqanov barsha qazaqstandyqtardy ekpe saldyrýdan bas tartpaýǵa shaqyrdy. «Men meditsina tarihyndaǵy nebir keseldiń emin tapqan ekpelerdiń tiimdiligi týraly zertteý jumystaryn jasadym. Ekpe – meditsina salasyndaǵy ozyq ideialardyń jemisi. Negizgi suraq vaktsinatsiia qajet pe, joq pa? Ekpeni ektirý kerek! Buǵan balama joq. Qazir áleýmettik jelilerde chipter týraly jáne basqa da alypqashpa jalǵan aqparat órip júr. Oǵan senýdiń qajeti joq. Óitkeni vaktsinalyq ekpe adamzatty sheshek, oba jáne basqa da aýyr pandemiialardan qutqaryp qaldy jáne ondai dert vaktsinatsiiadan keiin qaitalanbady. Sondyqtan men barlyq azamattardy ekpe jasatýǵa shaqyramyn! Bul máselede eki oi týyndamaǵany abzal. Múmkin bolsa, ekpe saldyrǵan durys. Aldymen, ózińizden buryn, jaqyndaryńyz ben týystaryńyzdyń densaýlyǵyn oilaýyńyz kerek. Qurmetti otandastar, barlyqtaryńyzdy ekpe qabyldaýǵa shaqyramyn»,– dep, barlyq áriptesterine qoldaý bildirdi Qanatbek Muqanov.
QazUÝ prorektory Mehmet Arslan ekpe saldyrýdyń qoǵam aldyndaǵy úlken jaýapkershilik ekenin aitady. «Men prorektor retinde qyzmet babymen jii is-saparlarǵa baramyn. Ártúrli is-sharalar barysynda kóptegen jandarmen kezdesemin. Qyzmet babyna bailanysty ózimdi ózgeler úshin de jaýapty sezinemin. Sondyqtan, birden ekpe qabyldaýǵa sheshim qabyldadym. Stýdentterdiń de, oqytýshylardyń da amandyǵy úshin barlyǵymyz ekpe alýymyz qajet. Ásirese bilim ordasynda barynsha jaýapkershilikti sezinip, memleket tarapynan berilgen múmkindikti durys paidalanǵan jón» degen oiymen bólisti.
QazUÝ meditsinalyq ortalyǵyna ázirge 50 ekpe berilgen. Kelesi lekke 600 ekpe beriletin bolady. Eriktilerdi ekpemen tolyq qamtý josparlanyp otyr.
Aita keterligi, «Spýtnik V» – álemdegi alǵash tirkelgen, tiimdiligi 90%-dan asatyn úsh ekpeniń biri. Onyń tiimdiligi 91,6%-dy kórsetken, bul málimet 19 866 eriktige synaq júrgizilgennen keiin alynǵan. Qazaqstan – bul ekpeni tirkegen álemdegi 27-shi memleket. Elimizde 1 aqpannan bastap azamattarǵa koronovirýstyq infektsiiaǵa qarsy ekpe salý bastalǵan bolatyn.
Nikolai Gamalei atyndaǵy epidemiologiia jáne mikrobiologiia ǵylymi-zertteý ortalyǵy jasaǵan Gam-KOVID-Vak nemese «Spýtnik V» vaktsinasy immýndyq reaktsiiasyn kúsheitý úshin 3 apta aralyǵymen eki ret salynady. Birinshi vaktsinamen 26 adenovirýs serotipine negizdelgen vaktsina, al ekinshisimen 5 serotip engiziledi. Ekpe salý erikti túrde júrgiziledi. Árbir azamat tańdaý quqyǵyna ie. Erikti túrde sheshim qabyldap, aldyn alý úshin áreket jasaý qazirgi tańda aýrýdan qutylýdyń jalǵyz joly bolyp tabylady.
