videodan alynǵan kadr
Reseidiń «Vagner» jeke áskeri kompaniiasynyń quramyna qosylǵan qazaqstandyq stýdent Marǵulan Bekenov málimdeme jasady, dep habarlaidy "Ult aqparat".
Ol beineúndeýinde reseilik áskeri qurylym qataryna óz erkimen qosylǵanyn aitady.
«BAQ betterinde Tomsk memlekettik ýniversitetiniń stýdenti, iaǵni meni urlap ketti dep jatyr. Sirá, bul men úshin qatty alańdap, mazasyzdanyp, kez kelgen jolmen men osy jerden alyp ketkisi kelgen anamnyń áreketinen shyqqan shý bolsa kerek», - deidi jas jigit.
Ol Reseidiń arnaiy áskeri operatsiiasyna óz úlesin qosqysy keletinin de jasyrmady.
«Vagner» jasaǵyna óz erkimmen qosyldym. Ózimdi jaqsy sezinemin, ujym da jaqsy, ózimdi taptym desem de bolady. Maǵan bul jer unaidy. Psihikalyq jáne emotsionaldyq turǵydan jaǵdaiym jaqsy. Taǵy da qaitalap aitamyn, meni eshkim urlap áketken joq», - dedi Marǵulan.
Bul videony Bekenov óz erkimen jazdy ma, álde qysymmen jazdy ma – belgisiz.
Aita keteiik, "Vagner" – Resei prezidenti Pýtinniń aspazy Evgenii Prigojinge tiesili jeke áskeri bólim. "Vagnerlikter" Siriiadaǵy, Afrika elderindegi jáne Ýkrainadaǵy soǵysqa qatysqan. Sarapshylar "Vagner" tobynyń kóp áreketin áskeri qylmysqa jatqyzady. Prigojin óziniń jeke áskeri bólimine Resei túrmelerinde otyrǵandardy, Ortalyq Aziiadan kelgen migranttardy da tartqan.
Qazir "Vagner" Ýkrainanyń Bahmýt qalasyndaǵy aýyr shaiqasqa qatysyp jatyr. Ýkrainadaǵy soǵysta "Prigojin áskeri" kóp shyǵynǵa ushyraǵany da aitylady.
Esterińizge sala keteiik, sheteldegi qarýly qaqtyǵystarǵa qatysqany úshin Qazaqstanda zań boiynsha bes jyldan toǵyz jylǵa deiin bas bostandyǵynan aiyrý jazasy kózdelgen.
