Búgin tańerteń úiine ushaq qulap ketken Rishat Qalibek esimdi azamat ótemaqy tólenbeýi múmkin dep qaýiptenedi. Ol bul týraly Azattyq Rýhy tilshisine aityp berdi.
Rishat Qalibek Almaty oblysy Talǵar aýdanyna qarasty jer telimin 2014 jyly satyp alǵan. Aýmaǵy 6 sottyq jerge úi salýdy osydan 5 jyl buryn bastaǵan. Biyl kirýdi josparlaǵanymen, kommýnikatsiia tartylmaǵandyqtan áli kóship barmaǵan.
«Úi bitken bolatyn, ishki árleý jumystary da aiaqtalǵan. Ishine jihazdy da kirgizip qoiǵanybyz. Biraq toq, sý joq. Biyl aqsha jetpei, sodan Shelek aýylyndaǵy týystarymmen turyp jatyrmyn», - deidi ushaq apatynan búlingen úidiń iesi.
Úi iesin Talǵar aýdanynyń ákimdigi dúisenbi kezdesýge shaqyrǵan. Sol jerde ótemaqy týraly sóilespek. Biraq jer telimine menshik quqyǵy bar azamat úige tiisti qujattardy rásimdep úlgermepti. Sondyqtan ótemaqy jaǵy qalai bolady dep alańdaidy. Ol úidiń jaramsyz bolyp qalǵanyn aitady.
«Otbasymda bir balam jáne áielim bar. Úsheýmiz ǵana emes, jaqynda Qytaidan inim kelgen. Sol jaqtan kóship kelgen qazaqtarmyz. Endi ol jaqtan áke-sheshem de keledi dep kútip júrmiz. Bárimiz turý úshin keń etip saldyq. Úidiń kólemi 180 sharshy metr bolatyn», - deidi Rishat Qalibek.
Al búgin Prezident Q.Toqaev Bas prokýratýra men Ishki ister ministrligine qozǵalǵan qylmystyq is aiasynda ushaq apatyna soqtyrǵan sebepterdi anyqtaý, kinálilerdi zańǵa sáikes jaýapkershilikke tartý, sondai-aq, Almaty áýejaiynyń aýmaǵyna jaqyn ornalasqan jeke qurylystardyń zańdylyǵyn zertteý jóninde shara qabyldaýdy tapsyrdy.
