Astana ákimi memlekettik organdarǵa qala turǵyndarynan úi qurylysynyń sapasyna qatysty shaǵymyn muqiiat zertteýdi júktedi. Jeke menshik kásiporyndardyń tarapynan qandai da bir buzýshylyq anyqtalǵan jaǵdaida tiisti quqyqtyq sharalardy qoldanýdy tapsyrdy, dep habarlaidy kaz.tengrinews.kz Elorda Info saityna silteme jasap.
"Qazir úkimetpen biznestegi kedergilerdi joiý úshin Doing Business saiasaty júrgizilip otyr. Barlyǵy kásipkerlikti damytý úshin jasalyp jatyr. Al sapasyz qurylys úshin turǵyndardyń narazylyǵyna memleket jaýap berip otyr.
Qarańyzdar, turǵyn úidi kim qabyldap alady? Tapsyrys berýshi, bas merdiger - jeke kompaniia, tehnikalyq qadaǵalaý - jekemenshik kompaniia, avtorlyq qadaǵalaý - jeke kompaniia. Iaǵni, tórt jeke kompaniia turǵyn úidi qabyldap alady. Memleket, belgili bir biýrokratiiany joiý úshin bul saladan ákimdikti alyp tastady. MSQB tek konstrýktsiiany tekseredi, onyń ózinde tek josparly tekseris negizinde. Barlyq jaýapkershilik bizneske júkteledi. Jaýapsyz biznesmender naryqtan ketýi kerek, biz oǵan kómektesemiz", - dedi Áset Isekeshev.
Buǵan qosa, ol ákimdik qazirgi kúni qurylystyń sapasyn baqylaýǵa qatysty zańǵa ózgeristermen tolyqtyrýlar engizý týraly usynys daiyndap jatqanyn habarlady. Onyń aitýynsha, sapasyz turǵyn úidi qabyldaityn tulǵalarǵa qatań shara qoldanyp, tipti litsenziiadan aiyrý kerektigin aitty.
"Tehnikalyq qadaǵalaý qaida qarady? Ondailardy litsenziiasy men attestarynan aiyryp, sotqa berý kerek. Bizde teksere alatyn prokýratýra jáne basqa da memlekettik organdar bar. Qalalyqtardyń barlyq shaǵymdaryn tekserý kerek. Úidi olai salýǵa bolmaidy. Ol - adamdardyń qaýipsizdik máselesi. Men kóptegen kásipkerlerdiń adal ekenin jáne óz abyroiyn oilaitynyn bilemin. Al myna jaýapsyzdar barlyq kartinany buzyp tur. Bul - bizdiń "Atameken" UKP ortalyq ustanymymyz", - dedi Astana ákimi.
