Aqordada ótip jatqan Úkimettiń keńeitilgen otyrysy barysynda Memleket basshysy Nursultan Nazarbaev jeke turǵyn úi qurylysyna arnalǵan jańa «Nurly jer» baǵdarlamasynyń qolǵa alynatynyn málimdedi. Atalǵan baǵdarlama aiasynda bos jatqan jerlerge injenerlik kommýnikatsiialardy tartyp, jeke úi salyp alý úshin 10 sotyq jer ýchaskelerin berý kózdelip otyr, dep xabarlaidy "Ult aqparat" Baq.kz-ke silteme jasap.
Prezidenttiń aitýynsha, búginde turǵyn-úi (kóp qabatty úiler -avt.) qurylysyna arnalǵan birqatar memlekettik baǵdarlamalarlyń qolǵa alynǵanyna qaramastan xalyqtyń baspanaǵa degen muqtajdyǵy joǵary bolyp tur.
«Biz atalǵan problemany sheshýdiń jańa jolyn usyna alamyz. Osyǵan orai, Úkimetke turǵyn úi qurylysy boiynsha «Nurly jer» atty biryńǵai baǵdarlamany ázirleýdi tapsyramyn. Buǵan deiin «Nurly jol» bolsa, endi "Nurly jer" bolady. Oǵan qazirgi baǵdarlamalardyń tetikterin (ipoteka, jalǵa alý, turǵyn úi jinaqtary - avt.) engizý kerek. Jańa baǵdarlamada jeke turǵyn-úi salýǵa basymdyq berý kerek», - dep atap kórsetti N.Nazarbaev.
Memleket basshysy árbir azamatqa 10 sotyq jer tiesili ekenin jetkizdi. Alaida ol jerdi berý injenerlik kommýnikatsiialar bolýy shart. Ondai jerde jaryq, elektr energiia men sý qubyrlary tartylýy qajet.
«Sondyqtan aldymen injenerlik-áleýmettik infraqurylymdy jasap berý kerek. Sol kezde jeke úidi salatyndardyń shyǵyndary azaiady. Demek, biz jeke baspanaǵa ketetin shyǵyndardyń 30 paiyzyn óz moinymyzǵa alyp otyrmyz», - dedi Prezident.
N.Nazarbaevtyń aitýynsha, injenerlik infraqurylymǵa ketetin shyǵyndardy qaitarý mexanizmin de ázirlep qoiý qajet. Al qalalardyń aýmaǵyna kiretin bos jerler memleket menshigine qaitarylýy shart. Sonyń esebinen qazaqtandyqtarǵa qalaǵa jaqyn 10 sotyq jerlerdi berý kózdelip otyr. Ondai jer ýchaskelerine injenerlik jelilerdi tartý jumysy da arzanǵa túsedi.
.jpeg)