"Utsań – maqtaidy, utylsań – dattaidy". Smetov otbasy, mansap pen jankúierler týraly

Qazaqstandyq dziýdoshy, halyqaralyq dárejedegi sport sheberi, Rio de Janeiro men Tokioda ótken Olimpiadanyń kúmis jáne qola júldegeri Eldos Smetovpen áńgimelesken edik. Sportshy otbasylyq ómiri men sport mansabyndaǵy josparlarymen bólisti, dep jazady Baq.kz portaly.

Otbasy jáne sport

Tokio olimpiadasynan oralǵan júldeger sportshy josparynyń biri densaýlyǵyn retke keltirý ekenin jasyrmady.

Qazirgi jospar solai bolyp tur. Biraz emdelýim kerek. Odan keiin qalpyna kelip jatsa, jattyǵýda kedergi keltirmese, odan ári kúresti jalǵastyramyz, - dedi Smetov.

Elimizdiń Ánuranyn oinatatyn sportshylar óte kóp. Ásirese, meniń salmaǵymda (60 keli) barshylyq. 66 kelide de bar. Ár salmaqta «men» degen jigitter bar. Ol jigitterdiń bolashaqtary jarqyn. Olar álemdi moiyndata alatynyna senemin. Sebebi qazaq degen myqty halyq qoi. Biz ózimizdiń myqtylyǵymyzdy qatty baǵalai almaimyz. Áitpese, bizdiń qanymyz taza, rýhymyz myqty, namysty, qaisar minezdi jigitter óte kóp. Eli men kók Týy úshin, eli men abyroiy úshin kúresetin er azamattar óte kóp. Sportshy eshqashan «utylamyn» dep barmaidy. Barlyǵy «jeńemin» dep barady, - dedi Eldos Smetov.

Ol video haip bolsa eken, eldiń bárine qyzyq bolsa eken degen maqsatta túsirilgen joq. Men onyń túsirilip jatqanynan habarsyz boldym. Tańerteń balalarymdy balabaqshaǵa turǵyzyp, erkeletip «qazir oqý-jattyǵý jiynyna ketem, baryp keleiin balam» degenimdi kelinshegim túsirip alyp, «storizyna» salypty. Oǵan adamdar shyǵyp, osynyń tolyq videosyn jiberińizshi depti. Men oqý-jattyǵý jiynyna baram degenshe, bireýler «keremet video shyqty» dep habarlasyp ketti, - dedi Eldos Smetov.

Barlyq qazaqstandyqqa úlken áser bergen video boldy. Qazir negativ óte kóp. Jaqsy nárse shyqpai ketti. Bir-birin dattap jatqan dúnieler kóbeiip ketti. Ondai áreketter azaisa, jaqsy bolatyn edi, - dedi ol.

Eki aptaǵa ketip, 3 kún úide bolamyz. Qaitadan 2 aptaǵa ketip jatatyn kezder bolady. Mysaly, olimpiadanyń aldynda úiimizden 1 aiǵa ketip qaldyq. Bala-shaǵamyzdy bir ai kórmedik, - dedi Smetov.

Arman men maqsat

Sportshy óziniń eń úlken armanyn aitty.

Musylman adamnyń armany - jánnattyq bolý. Bul ómirdeginiń barlyǵy maqsat. Sol maqsattarǵa jetý kerek. Bul ómirdegi eń úlken maqsatym – Olimpiadanyń altyny edi. Ókinishke qarai, kúmis pen qola bolyp qaldy. Biraq men bul nárselerge ókinbeimin. Alda josparlar bar. Naqty emes, árine. Qazir meniń ata-anam kórip jatqan ómirdi, men de óz balalarymnan kórsem deimin. Men úshin sodan asqan baqyt joq bul ómirde, - dedi Eldos Smetov.

Sportshy halyqtyń qoldaýy bolǵandyqtan, ózin batyr sezinetinin de jasyrmady.

Árine, ózimdi batyr sezinemin. Elim úshin, elimniń abyroiy men kók Týdy jelbiretý úshin tyrysyp júrmiz. Mysaly, ata-babalarymyz aq naizanyń ushymen, aq bilektiń kúshimen jerin qorǵaý úshin soǵysqa attanǵan. Qazir biz egemendi el boldyq. Ata-babamyz miras etip qaldyrǵan jerindemiz. Qazirgi soǵys - sportta úlken jetistikterge jetý. Elimizdi tanytyp, atyn shyǵarý. Sondyqtan sportshylar - qazirgi tańnyń batyrlary. Men de ózimdi batyrmyn dep oilaimyn. Sebebi Álem birinshiligi men Olimpiada oiyndarynda Týymyzdy jelbirettik, - dedi ol.

Onyń aitýynsha, kórermeni kóp fýtboldan keiin jankúieri basym dziýdo tur.

Sheteldik kez kelgen dziýdo súier qaýymnan «Smetov Eldos kim?» dep surasań barlyǵy tanidy. Sondyqtan men qazaqtyń kim ekenin kórsetkenime óte qýanyshtymyn, - dedi Smetov.

Baq pen bap

Dziýdoshy aitqandai, jetistikke jetý úshin ár adam óz isin jaqsy kórýi kerek.

Birlik te bolý kerek. Aziia qurlyqtarynda biz komandalyq esepte finalda otyramyz. Bul úlken jetistik. Sebebi Aziia qurlyǵyna dziýdo damyǵan kil myqty elder kiredi. Mysaly, Japoniia, Koreia, Mońǵoliia, Ózbekstan elderiniń sportshylary qazir myqty. Qazaqstandyqtardyń da áleýeti óte joǵary, - dedi Eldos Smetov.

Olimpiada júldegeriniń aitýynsha, dziýdoda buryn da myqty sportshylar boldy. Biraq osyndai nátije bolmaǵan.

Myqty sportshylar óte kóp boldy. Meniń salmaǵymda Bazarbek Dombai, Salamat Otarbaev degen aǵalarymyz boldy. Olar Olimpiada oiyndarynda top jarmasa da, kúresteri myqty boldy. Olar dziýdo endi damyp kele jatqan eń qiyn kezeńdegi sportshylar boldy. Ashat Jitkeev dziýdodan Olimpiada oiyndarynyń tuńǵysh júldegeri. Qazir dziýdonyń damý qarqyny óte myqty, - dedi Smetov.

Namys pen qamys

Sportshy áńgimesiniń sońynda halyqqa qoldaý kórsetkeni úshin alǵysyn jetkizdi.

Meniń úshinshi ornymdy altynǵa balap jatqan halqyma alǵysym sheksiz. Olardyń kóńilderinen shyǵyp, senimin aqtaǵanyma óte qýanyshtymyn. Qazir Olimpiada jalǵasyp jatyr. Baýyrlarymyz áli baq synasyp jatyr. Elimizdiń Ánuranyn oinatady dep senemiz. Qazir álemdi indet jaýlap jatqan kez. Osyndai kezde jattyǵý jasap, Olimpiadaǵa ruqsat alýdyń ózi úlken erlik. Utsań - maqtap, utylsań - dattap jatady. Utylǵan balýandardy dattamai, saǵyn syndyrmai, kerisinshe qanattandyryp ári qarai umtylýyna yntalandyrý kerek. Jeti ret qulasań da, segizinshi ret turyp júrýge haqyń bar deidi ǵoi. Qansha qulasa da, ár sportshynyń turyp júrýine haqysy bar. Sondyqtan olardyń saǵyn syndyrýdan paida joq. Olarǵa senim uialatyp, qoldasa, ǵana erik-jiger oianady. Sol úshin halyqtyń senimi men qoldaýy kerek, - dedi Eldos Smetov.

Onyń aitýynsha, onsyz da moinyna úlken jaýapkershilik alyp, el namysyn arqalaǵan sportshylar súringen kezde, odan ári syndyrýdyń qajeti joq.

Súringen adamdy turǵyzyp, odan ári qoldaý kórsetse, ol minezin qairaidy, shyńdalady. Keleside jeńimpaz bolýǵa tyrysady, - dedi ol.

Smetov Tokio Olipiadasynyń kórermensiz ótýi ózine qalai áser etkenin jetkizdi.

Dziýdo - kórermeni kóp sporttyń túri. Kúresý kezinde sportshynyń ádemi ádisterin kórermen qolpashtap otyratyn edi. Biz de kórermenniń qoldaýyna úirenip qalǵan edik. Tokio Olipiadasynda kórermenniń bolmaýy ziianyn tigizdi dep te aitýǵa bolady. Degenmen teledidar ár jaǵynda halqymyzdyń qoldaýy men lebizi bar ekenin bildik, sezdik. Sol arqyly namyzymyzdy qamshylap otyrdyq, - dedi Eldos Smetov.

Tokio Olimpiadasynda Smetov qola medalǵa talasta Tornike Tsiakadoeany jeńgenin aita keteiik. Osylaisha, ol Qazaqstan quramasynyń qorjynyna alǵashqy Olimpiada medalin salǵan edi.