Básekelestikti qorǵaý jáne damytý agenttiginiń tóraǵasy Serik Jumanǵarin baǵaǵa qatysty sóz bailasý jáne ústem jaǵdaidy teris paidalanatyn saýda jelileri týraly aitty, dep habarlaidy QazAqparat.
«Áleýmettik mańyzy bar azyq-túlik taýarlary naryqtaryna toqtalsaq, básekelestikke qarsy kelisilgen áreketter jáne ústem nemese monopoliialyq jaǵdaidy teris paidalaný belgileri boiynsha baǵalardy tómendetý týraly 60 habarlama shyǵaryldy. Onyń ishinde, 50-i azyq-túlik taýarlaryna baǵalardy 5 paiyzdan 10 paiyzǵa deiin tómendetti. 8 tergep-tekserý jumystary bastaldy. Áleýmettik mańyzy bar azyq-túlik taýarlar baǵalarynyń ósýiniń apta saiynǵy serpini 0,6 paiyzdan minýs 0,2 paiyzǵa deiin tómendedi», - dedi S. Jumanǵarin Úkimet otyrysynda.
Onyń aitýynsha, Memleket basshysynyń kóterme saýda naryǵyna basty nazar aýdara otyryp, azyq-túlik taýarlarynyń barlyq baǵasy boiynsha deldaldyq shemalardy tekserý týraly tapsyrmasyn oryndaý aiasynda 13 taýar pozitsiiasy turǵysynda jumys júrgizilip jatyr.
«Ekinshi másele, saýda jeliler qyzmetine qatysty. Riteil naryǵyn taldaý aiasynda saýda ústemeaqysynyń negizdiligin keshendi túrde tekserilýi bastaldy. Saýda jelileriniń áleýmettik mańyzy bar azyq-túlik taýarlaryna saýda ústemeaqysyn 15 paiyzdan asyrǵandyǵy boiynsha 25 fakti anyqtaldy, osyǵan orai jergilikti atqarýshy organdarǵa jaýapkershilikke tartý úshin materialdar jiberildi. Baǵaǵa qatysty sóz bailasý jáne ústem jaǵdaidy teris paidalaný belgileri boiynsha 10 saýda jelisine qatysty sharalar qabyldandy. Saýda jelilerine qatysty jumys jalǵasýda. Eń iri respýblikalyq jeli «Magným» («Magnum Cash@Carry» JShS) ózine áleýmettik mańyzy bar azyq-túlik taýarlaryna saýda ústemesin 15-ten 10 paiyzǵa deiin tómendetý týraly mindetteme aldy», - dedi agenttik basshysy.
