Almaty halyqaralyq áýejaiy ishki áýe reisterdiń alǵashqysyn qabyldady. Jolaýshylar Nur-Sultannan ońtústik astanaǵa ushyp keldi, - dep habarlaidy QazAqparat.
Air Astana áýekompaniiasynyń prezidenti Piter Fosterdiń aitýynsha, jolaýshylar ushýdan bas tartyp jatyr. Oǵan sebep, koronavirýsqa tekserý protsedýrasy.
«Bul Qazaqstannyń men aviatsiianyń damýy úshin óte mańyzdy. Búgin tańerteń Almaty-Nur-Sultan jáne keri baǵyttaǵy alǵashqy reisti aiaqtadyq. Jalpy, biz osy marshrýt boiynsha kúnine úsh reis jasaimyz. Biz reisterdi azamattyq aviatsiiany qalpyna keltirý úshin jańa sanitarlyq talaptarǵa sáikes jasaimyz. Áýe kemesinde áleýmettik qashyqtyq ólshemderi engizildi», - dedi Air Astana kompaniiasynyń prezidenti Piter Foster.
Sonymen qatar, ol aviakompaniia barlyq talaptardyń mańyzdylyǵyn túsinetinin atap ótti.
«Biz úshin jolaýshylar qaýipsizdigi – basty mindet. Osy qoiylǵan talap boiynsha alǵa jyljimyz. Biz sondai-aq tótenshe jaǵdai aiaqtalǵannan keiin ishki baǵyttar jelisin keńeitýdi josparlap otyrmyz», - dedi ol.
Piter Foster marshrýt boiynsha eń joǵary tarif 36 myń teńge, eń tómengi 21 myń teńge ekenin atap ótti.
«Bul tek birinshi reis, júkteme aitarlyqtai joǵary boldy dep aitýǵa bolady, biraq jolaýshylar tarapynan bastartýlar kóp boldy. Óitkeni testileý protsedýralary óte kúrdeli jáne qymbat», - dep tolyqtyrdy ol.
Almatydan elordaǵa alǵashqy reispen 75 jolaýshy ushyp bardy.
Eske sala ketsek, 4 mamyrdan bastap Nur-Sultan men Almatydan Qyzylordaǵa, Petropavlǵa, Óskemenge jáne Semeige áýe qatynastary qaita jandanady.
