Úshtildilik – jat qalyp!

Ult aqyny Maǵjan Juma­baev ótken ǵasyrda ult taǵdyryna alańdaýshylyq bildirip, qazaqtyń keleshekte el bolýy mektebiniń qandai negizge qurylýyna bailanysty ekenin aita kelip: “...sońǵy kezde kózsiz elikteýshilik bizdiń janymyzǵa sińip barady. Qazaq janyn qaishylap otyryp jat qalypqa salmaqshymyz. Jat qalypty qazaq janyna qabystyrý, iaki jańa qalyp jasaý tájiribesine kirisýimiz qaradai qorqytady” depti. Qairan aqyn qalai dál aitqan deseńizshi?! Búgingi tańda jat qalyp degenimiz – úshtildilik reformasy, al qorqyp otyrǵanymyz – sol reformanyń mysyqtabandap ómirge enip jatqandyǵy. Apyr-ai, halyqtyń quptamaǵanyn qulaqqa qystyrmai, qasarysqan qandai qatygez bilik deseńizshi. “Halyq qalasa, han túiesin soiady” degen beker-aý, shamasy...

Besikten beli endi bosaǵan balaǵa aýyr taýqymet arqalatyp otyrmyz. Balalarymyzdy máńgúrttendirýge bet aldyq. Biraq úshtildilikpen urpaqty ushpaqqa shyǵaramyz dep bilik jantalasýyn qoiar emes. Bizdiń kórnekti ǵalymdarymyz, qai­ratkerlerimiz, qarapaiym ult janashyrlary, mamandarymyz úshtildiliktiń kem-ketikterin aiqyndap, tarazylap, uńǵyl-shuńǵylyn tarqatyp, talqylap, saraptap aitýdai-aq aityp, jerine jetkize jazyp ta jatyr. Bári beker eken. Ministr Saǵadiev miz baǵar emes. Úmitten kúdik basym bolyp tur...

Úsh ailyq ǵumyry bar “EKSPO” ertegisine elitip, esinen tanyp júrgen aqsúiek myrzalardy balalardyń bolashaǵy múldem mazalamaityn siiaqty. Úshtildilik – jat qalyp! Osy jat qalyp bizdiń bilim teńiziniń aidynyna jaiǵasatyn bolsa, kóp nárseni joǵaltatynymyz aitpasa da túsinikti

Mahambet SAPARMURATOV,

M.Shoqai atyndaǵy orta mektep muǵalimi,

Maqtaaral aýdany,

Ońtústik Qazaqstan oblysy

"Jas Alash" gazeti