Foto: Halyq Uni
Májilis depýtattary Almaty oblysynyń Qarasai aýdanynda bolyp jatqan zańsyzdyqtarǵa shuǵyl nazar aýdarýǵa shaqyrdy, - dep habarlaidy Sputnik Qazaqstan.
Depýtat Maqsat Tolyqbaidyń aitýynsha, Úshqońyr taýy búginde sai-sala, qyrat-jotalarymen túgel bir azamattardyń ǵana menshiginde.
"Almaty oblysyndaǵy Úshqońyr ústirtine barar joldy basynan-aiaǵyna deiin muzdai qarýlanǵan top kúzetedi. Jol joq emes. bar. Biraq jabyq. Úshqońyr Ile Alataý parkine qaraityndyqtan, ol aýmaqty Ulttyq parktiń kúzetshileri kúzetýi kerek emes pe? Álde, bul taý "DúnieAgro" kompaniiasyna atasynan mura bolyp qalǵan ba? Qyratqa kireberisten 8 shaqyrym qashyqta ornalasqan rezidentsiianyń aýmaǵy ǵana qorshalyp, shlagbaým qoiylsa taǵy bir sári. Al, jan balasyn jýytpai, taýdy ainaldyra qorshap tastaý – baryp turǵan bassyzdyq", - dep ashyndy ol vitse-premer Serik Jumnǵarin men bas prokýror Berik Asylovqa joldaǵan depýtattyq saýalynda.
Aitýynsha, Qarasai aýdanynyń turǵyndary óz jerine malyn jaia almai, pushaiman kúide otyr. Amanat partiiasy jaiylym tapshylyǵyn sheshý úshin arnaiy "Jer amanaty" komissiiasynyń tikelei aralasýymen respýblika boiynsha 9 mln gektardan astam jer qaitarǵan, al onyń osy aimaqtan 1400 gektary el igiligine berildi.
"Sóitsek, onymyz beker eken, "amanattyq" aǵaiyn! Jurtqa qajet jaiylym jerdiń bári jańaǵy qorshaýda qalyp qoiǵan. Osylaisha jurttyń óz jerine kirmek túgili jańaǵy qarýly beketten ótýge dáti jetpei júr", - deidi Maqsat Tolyqbai.
Atap aitqanda, "DúnieAgro" JShS-ne 2004 jyly "Úshqońyr" ústirtinde ornalasqan júzdegen gektar jerge menshik quqyǵy zańsyz berilgen. Óitkeni zań talaptary boiynsha arnaiy maqsattaǵy jerlerdi zańdy tulǵalardyń jekeshelep alýyna quqyǵy joq. Tipti ony bólýge de kelmeidi. Bul normalardy jergilikti prokýratýra jaqsy biledi. Biraq jerdiń zańsyz berilý faktisi boiynsha prokýratýranyń talaptaryn sot qanaǵattandyrmai tastaǵan. Soraqysy da sol bolyp tur, dep jalǵastyrdy sózin májilismen.
Budan bólek, "Úshqońyr" ústirtinde "Steppe AgroMeat", "Breeding Company" siiaqty eki-úsh kompaniia 13 597 ga jerdi áli kúnge deiin maqsatsyz paidalanyp otyrǵany anyqtaldy.
"Shuǵyl qaitarý kerek! Alaida alpaýyttarmen alysýǵa ákimdik pen aýdan prokýrorlarynyń pármeni jetpei, taǵy da dármeni quri ma degen kúdik te joq emes. Sondyqtan Almaty oblysynyń Qarasai aýdanynda bolyp jatqan zańsyzdyqtarǵa Bas prokýratýra men Úkimet shuǵyl nazar aýdaryp, arnaiy komissiia quryp, osy máselelerge tiisti quqyqtyq baǵa berýge tiis dep esepteimin", - dedi depýtat.
Tolyqbaidyń pikirinshe, Prezidenttiń el igiline qaitarylýy qajet jaiylymdyq jerler boiynsha tapsyrmasyn naqty oryndaý kerek.
