Sport ardageri, Olimpiada chempiony Jaqsylyq Úshkempirov Prezidenttiń sportty qoldaý baǵytyndaǵy tapsyrmalary men jaqynda elordada kúres túrlerinen ótken Álem chempionatynyń qorytyndysyna bailanysty pikirin bildirdi, dep habarlaidy QazAqparat.
«Prezident Qasym-Jomart Kemeluly óziniń Joldaýynda balalar úshin sport keshenderiniń qoljetimdi bolýyn erekshe atap ótkeni belgili. Mine, biz osy tapsyrmasyna jiti mańyz berýimiz kerek. Sebebi, qalalardan bólek, aýylda nebir jas chempiondar júr. Bárimiz aýyldan shyqtyq. Bala kezden tamaǵy toq, aýyldyń jumysyna myǵym balanyń sportta baǵyndyrar shyńy biik. Tek sol jetkinshekterdi durys baǵyttap, jeńis dámin tatqyzyp jiberetin sport zaly men bilikti jattyqtyrýshy bolýy kerek», - deidi Jaqsylyq Úshkempirov.
Sport ardageri sonymen birge Nur-Sultan qalasynda kúres túrlerinen ótken Álem Chempionatynyń uiymdastyrylýyn joǵary baǵalady.
«Mundai Álem chempionatyn ótkizý – kez kelgen memleket úshin úlken mártebe. Kelesi jyly Tokioda ótetin Olimpiada aldynda bul da bir daiyndyqty pysyqtaý dep bilemin. Tórtjyldyqtyń basty básekesi – Olimpiada oiyndaryna 8 joldama utyp alýdyń ózi sportshylarymyzdyń básekege qabilettiligin bildiredi. Iia, altyn medaldan úmitti bolǵanymyz ras, degenmen, ókinishke orai, altyn buiyrmady. Sebebi, sportshylardyń deńgeii óte joǵary boldy. Dese de, uiymdastyrý jaǵynda eshqandai min joq. Basqa Álem chempionattaryn kórip júrmin, úidegi týrnirdiń bási basqalardan joǵary ekenin moiyndaimyn. Uiymdastyrýshylar barlyq jaǵyn jaqsylap oilastyrǵan»,-dedi Jaqsylyq Úshkempirov.
Aita keteiik, 2019 jyldyń 14-22 qyrkúiek aralyǵynda Nur-Sultan qalasynda grek-rim, erkin jáne áielder kúresinen álem chempionatyn ótti. Nur-Sultandaǵy álem birinshiligi 2020 jylǵy Tokio Olimpiadasynyń litsenziiasy úlestirilgen alǵashqy irikteý týrniri boldy. El qorjynynda 3 kúmis, 4 qola, 8 olimpiada joldamasy bar.
