2018-2019 oqý jylynyń 3 toqsanynan bastap 5 jáne 7 synyp oqýshylaryna jańa kýrs engiziledi. Bul týraly búgin QR Parlamenti Senatyndaǵy Úkimet saǵatynda Bilim jáne ǵylym vitse-ministri Elmira Sýhanberdieva aitty, dep habarlaidy QazAqparat tilshisi.
«Orta bilim berýdi jańartylǵan mazmunǵa kóshirý jumystary bekitilgen keste boiynsha jalǵasýda. Biylǵy oqý jylynan bastap 3, 6, 8 synyptar osy baǵdarlamamen oqi bastady. 4, 9, 10 synyptarda aprobatsiiadan ótkizilýde. Oqýlyqtardyń sapasy men mazmunyn jaqsartý úshin biraz jumys jasaldy. Atap aitsaq, oqýlyqtardyń elektrondy nusqalary engizildi. Pándik jáne respýblikalyq komissiialardyń quramy bilikti muǵalimdermen, ádiskerlermen tolyqty. Oqýlyqtardy 4 jyl saiyn qaita basyp shyǵarý normasyn erejeden alyp tastaý ne qaldyrý máselesi qarastyrylyp jatyr», - dedi ol.
Vitse-ministrdiń aitýynsha, «Rýhani jańǵyrý» baǵdarlamasy aiasynda 5, 7 synyptarǵa «Ólketaný» kýrsy biylǵy oqý jylynyń ekinshi jartyjyldyǵynan bastap alǵash ret engizilmek.
«Oqýlyǵy daiyn. Jergilikti atqarýshy organdar satyp alyp jatyr», - dedi Elmira Sýhanberdieva. Onyń dereginshe, biyldan bastap 1, 11 synyptarǵa arnalǵan jańa tiptik oqý jospary bekitilgen.
«Endi tek bir ǵana úlgidegi oqý jospary bolmaidy. Birneshe úlgidegi oqý baǵdarlamasyn daiyndap bekittik. Mektepter ózderine jaramdy baǵdarlama boiynsha jumys jasaýyna múmkindik berdik. Barlyq mektepterde osy úlgilik oqý baǵdarlamasy arqyly akademiialyq derbestik alady dep esepteimiz. Qai baǵdarlamamen jumys isteitinin ózderi sheshedi», - dedi vitse-ministr.
