Májilis Tóraǵasy Nurlan Nyǵmatýlinniń atyna basqa elderdiń Parlamentterinen ushaq apatynan jolaýshylardyń qaza tabýyna bailanysty kóńil aitý jedelhattary kelip túsýde, dep habarlaidy "Ult aqparat".
«Armeniia Respýblikasynyń Ulttyq Assambleiasy atynan jáne jeke óz atymnan «Bek Air» ushaǵynyń apatqa ushyraýynyń saldarynan jolaýshylardyń qaza bolýyna bailanysty qaiǵysyna ortaqtasyp kóńil aitamyn», - delingen Armeniia Ulttyq Jinalysynyń Tóraǵasy Ararat Mirzoiannyń jedelhatynda.
Qyrǵyz Respýblikasy Jogorký Kenesh Tóraǵasy Dastan Jumabekov te qazaqstandyq áriptesine kóńil aitý jedelhatyn joldady.
«Resei Federatsiiasy Federaldy Jinalysy Memlekettik Dýmasynyń depýtattary atynan jáne óz atymnan Sizden qaza bolǵandardyń týystary men jaqyndaryna kóńil aitý jáne qoldaý sózderimdi jetkizýlerińizdi suraimyn jáne zardap shekkenderdiń tezirek saýyǵyp ketýlerine tilektespin», - delingen Resei Memlekettik Dýmasynyń Tóraǵasy Viacheslav Volodinniń jedelhatynda.
Túrkiia Uly Ulttyq Májilisiniń Spikeri Mýstafa Shentop túrik halqy baýyrlas Qazaqstan halqymen orny tolmas aýyr qaiǵy-qasiretti bólisetinin atap ótti.
Májilis Spikerine joldanǵan jedelhattar kelýdi jalǵastyrýda.
