Polsha, Ázerbaijan jáne Grýziiada júrgen Qazaqstan azamattaryn elge alyp kelý úshin arnaiy ushaq jiberiledi. Bul týraly QR Syrtqy ister ministrliginiń resmi ókili Aibek Smadiiarov aitty, dep habarlaidy "Ult aqparat".
«Qazirgi ýaqytta el Úkimeti halyqaralyq aviaqatynastardyń jabylýyna bailanysty eń aldymen, Polsha, Grýziia jáne Ázerbaijannan QR azamattaryn qaitarý týraly sheshim qabyldady. SIM qazaqstandyq azamattardy qaitarýdy uiymdastyrý barysynda basqa memlekettik organdarmen tyǵyz úilesimdi jumys atqarýda. Qazaqstandyqtardyń úige qaityp oralýyn Air Astana jáne Scat aviakompaniialary tómen baǵamen reisterdi uiymdastyrý arqyly júzege asyrady», - dedi resmi ókil.
Onyń atap ótýinshe, qazirgi ýaqytta Máskeý qalasynyń «Vnýkovo» áýejaiyndaǵy 30-ǵa jýyq qazaqstandyqty elge qaitarý máselesi sheshilýde. Olardyń qolynda biletter bar, ushý ýaqyty boiynsha SCAT aviakompaniiasymen kelisý jumystary júrip jatyr. Sonymen qatar Reseidiń basqa da qalalarynan azamattarymyzdy qaitarý boiynsha qiyndyqtar bar. Atap aitqanda, Ombyda 26 adam, Novosibirde 8 adam, Ekaterinbýrgte 11 adam, Barnaýl, Samarada 10 adam jáne Cheliabi, Orynbor syndy qalalarda birneshe adam Qazaqstanǵa qaita almai otyr.
«Qazir Bishkek qalasynda Atyraýdan kelgen bir top azamatymyz bar. Olardyń arasynda erekshe tasymaldaý sharttary talap etiletin DTsP diagnozy bar balalar bolǵandyqtan, bul jaǵdaida Qorǵanys ministrliginiń aviatsiiasy paidalanylatyn bolady», - dedi Aibek Smadiiarov.
