Shymkentke jumys sapary aiasynda QR Eńbek jáne halyqty áleýmettik qorǵaý ministri Berdibek Saparbaev ataýly áleýmettik kómek, jańa jumys oryndaryn qurý, halyqty jumyspen qamtý jáne basqa da áleýmettik-eńbek salasynyń máseleleri boiynsha keńes ótkizdi. Bul týraly "Ult aqparat" ministrliktiń baspasóz qyzmetine silteme jasap habarlaidy.
Eńbek ministrligi basshysynyń málimetinshe, búginde Qazaqstanda ataýly áleýmettik kómek alatyn 291 myń otbasy nemese 1 million 450 myń adamǵa 87 mlrd. teńge tólendi. Bul rette AÁK alýshylardyń 38% - Shymkent qalasy men Túrkistan oblysynyń turǵyndary.
Berdibek Saparbaev AÁK-tiń negizgi maqsaty – qiyn jaǵdaiǵa tap bolǵan otbasylarǵa kómek kórsetý, sonyń ishinde jumyspen qamtýdyń belsendi sharalaryn kórsetý arqyly járdemdesý ekenine erekshe nazar aýdardy. Osyǵan bailanysty ol jergilikti jerlerde aqparattyq-túsindirý jumystaryn kúsheitý qajettigin atap ótti.
Ministrdiń málimetinshe, respýblika boiynsha eńbekke qabiletti 85 myń AÁK alýshynyń tek 32,5 myńy nemese 38 paiyzy ǵana áleýmettik kelisimsharttar jasasqan. Túrkistan oblysynda bul kórsetkish 29 paiyzdy, Shymkent qalasynda 9 paiyzdy quraidy.
«Keibir jumysqa qabiletti azamattar AÁK-ti alǵysy keledi, biraq jumys isteýden bas tartady. Eńbekke qabiletti áleýmettik kómek alýshylarmen mindetti túrde olar jumysqa ornalasa alatyn, jańa mamandyqtar men biznes júrgizý negizderin oqityn, granttar men jeńildetilgen mikrokredit alatyn áleýmettik kelisimsharttar jasaý kerek. Masyldyqqa jaǵdai jasaýǵa bolmaidy, sondyqtan tiisti ózgerister erejege engiziletin bolady», dedi Saparbaev.
Sondai-aq, vedomstvo basshysy ataýly áleýmettik kómek taǵaiyndaý jáne tóleý kezinde zańbuzýshylyqtarǵa jol berilmeýin talap etti.
«Bizdiń mamandarymyz «E-Halyq IP»-de tirkelmegen tólemder, artyq tólemder, eki eselengen tólemder, ýchaskelik komissiianyń tekserýinsiz AÁK taǵaiyndaý siiaqty birqatar zańbuzýshylyqtardy anyqtady. Mysaly, menshiginde úsh qabatty kottedj ben avtokóligi bar azamattarǵa AÁK tólenip ketken jaǵdailar da oryn alǵan. Bul biýdjet qarajatyn zańsyz paidalaný jáne oǵan jaýapkershilik kózdelgen. Ákimdikterge jergilikti jerlerde baqylaýdy kúsheitý kerek», - dep atap ótti ministr.
Osyǵan bailanysty Ministrlik tarapynan ákimdiktermen jáne quqyq qorǵaý organdarymen birlesip anyqtalǵan zańbuzýshylyqtardy joiýǵa, zańsyz tólengen qarajatty biýdjetke qaitarýǵa, sondai-aq bolashaqta mundai zańbuzýshylyqtarǵa jol bermeýge baǵyttalǵan jumystar atqarylyp jatyr.
Sonymen qatar, keńeste jańa jumys oryndaryn ashý, jalaqy boiynsha bereshekterdi tóleý, jumyssyz jáne az qamtylǵan azamattardy «Eńbek» memlekettik baǵdarlamasyna tartý máseleleri qaraldy.
