Photo : pixabay/rebcenter-moscow
Almatyda úsh balasyn terezeden laqtyryp, artynsha ózi de sekirip ketken kelinshektiń ata-enesi kelinniń mundai qadamǵa barýyna joqshylyq sebep bolýy múmkin emes deidi.
Súiip qosylǵan erli-zaiyptynyń arasynda urys-keris bolmaǵanyn aitady. Olar endi ulynyń ómirine de alańdaýly, dep habarlady Sputnik Qazaqstan agenttigi "Astana" arnasyna silteme jasap.
Bir kúnde tórt adamynan aiyrylǵan Orazovtar otbasy ulymyz da óz-ózine qol sala ma dep qorqady. Baýyrlary kúndiz-túni qasynda, bir eli ajyrap jatqan joq, dedi Nursultannyń ákesi.
Úsh nemeresi men kelininen airylyp, eseńgiregen Baýyrjan Orazov "Gúlim" dep erkeletken kelininiń mundai qadamǵa qalai barǵanyn túsine alar emes.
"Ekeýi ózi súiip úilendi, úsh balaly boldy. Nursultandy jaman bala dep aitpaimyn. Kórshilerim biledi, jora-joldastary biledi. Mysaly ishpeitin, shekpeitin bala. Kelin de altyn adam edi. Nursultan - otbasynyń tuńǵyshy", - deidi marqumnyń qaiyn atasy Baýyrjan Orazov.
Onyń aitýynsha, uly bazarda saýda-sattyq jasaidy. Kelininiń sýitsidke barýyna joqshylyq sebep boldy deýge negiz joq. Nesieleri de joq kórinedi.
26 jyl ishki ister salasynda eńbek etken azamat kelini qaldyrǵan hatynda kimderdi meńgezeni ózderine de jumbaq bolyp turǵanyn aitady.
"Bul ómirdiń taýqymetine shydai almadym. Biraq eshkimge qoiar kinám joq. Biraq kináliler ózderi biledi, dep jazyp ketipti. Oǵan meniń de basym jetpedi. Ne boldy, ne qoidy?", - deidi ol.
Marqumnyń qúieýiniń týysy Ǵalymjan Orazov ta Nursultannyń araq ishpeitinin aitty.
"Minezi salmaqty. Kelinge urysyp aiqailap jatqanyn kórgen emespiz. Qudaiǵa shúkir turmystyq jaǵdaiy jaqsy ol balanyń. Bizge kelip bir nanǵa aqsha bershi dep jatqan joq. Ózimizge qupiia bolyp tur bul jaǵdai", - deidi ol.
Al anasynyń sheshimimen kókke ushyp kete barǵan úsh perishteniń úlkeni biyl ǵana birinshi synypqa barypty, ekinshi qyzy daiyndyq tobynda oqyǵan. Al kenje ul jaqynda eki jasqa tolar edi.
Baýyrjan Orazovtyń aitýynsha, uly men kelini úilengeli Almatyda turady. Tamyz aiynda ǵana mektepke jaqyn bolsyn dep toǵyzynshy qabattaǵy páterdi 120 myń teńgege jalǵa alypty. Balalardyń qaýipsizdigi úshin terezesine tor ornatý kerek dep aitqan da eken.
"Alǵashynda nemerelerim qolymda oqysa degen tilegimdi de aitqanmyn, biraq jastar qulaq aspady", - degen ókinishi de bar ákeniń.
Al "31 arnanyń" habarlaýynsha, Baqtygúl Qydyrbaeva mikrokredittik uiymdardan úsh ret qaryz alǵan. Eń sońǵy ret áiel qazanda 15 myń teńge bereshek alǵan, alaida otbasy bul qaryzyn qaitara almaǵan. Onyń aldyndaǵy eki nesiesi boiynsha da tóleý merzimin ótkizip alǵan. Marqumnyń kúieýiniń aitýynsha, ol jumyssyz bolǵandyqtan qaryzdy tólei almaǵan. Ol qaiǵyly jaǵdai aldynda áielimen janjaldaspaǵanyn aitty. Alaida dál sol kúni ol úide bolmapty, jumyssyz qalǵandyqtan, ketip qalǵan.
Al Baqytgúl Qydyrbaevanyń týystary onyń minezinen alańdaityn ózgeris baiqamaǵanyn aitty. Olar ádettegidei hat almasqan. Baqytgúldiń ápkesiniń aitýynsha, onyń kóńil-kúii jaqsy bolǵan, balasyna alǵan jańa kombinezonynyń fotosyn, qyzynyń maqtaý qaǵazyn kórsetken.
Sondai-aq Baqytgúldiń ápkesi buǵan deiin marqumnyń eki ret anafilaktikalyq shok alǵanyn aitty.
"Túsiniksiz allergiiasy boldy. Keiingi eki aida prednizolon qabyldap, áreń aman qaldy", - deidi Janar Qydyrbaeva.
Áiel úsh balasymen birge sekirip ketti
Almatyda 22 qarasha Jetisý-1 shaǵyn aýdanyndaǵy kópqabatty úilerdiń birinde 28 jastaǵy áiel úsh balasymen birge 9-qabattan sekirip ketti. Tórteýi de kóz jumdy.
Almatylyq kelinshek óler aldynda hat qaldyrǵan. Ol synaqqa shydai almaǵanyn, kinálilerdiń ózi biletinin aitqan.
Almaty qalasynyń politsiia departamenti qaiǵyly jaǵdaidyń aldyn ala sebebin habarlady.
"Bul áreketke otbasylyq-turmystyq qarym-qatynas kezinde kúieýi ekeýiniń arasyndaǵy janjal sebep bolǵan", - delingen politsiia habarlamasynda.
Jedel-tergeý toby quryldy. Oqiǵa boiynsha Qylmystyq kodekstiń ("Óz-ózine qol jumsaýǵa jetkizý") baby boiynsha tergeý júrgizilip jatyr.
