Foto: QR DSM
Abai oblystyq Densaýlyq saqtaý basqarmasynyń málimetinshe, zardap shekken qyz bala meditsinalyq aviatsiia arqyly aýdandyq aýrýhanadan Semei meditsina ýniversiteti gospitaliniń balalar bólimshesine jetkizilgen, dep habarlaidy Ult.kz.
«Jaraqatynyń aýyrlyǵyna jáne tasymaldaý kezinde ómirine qaýip tóndirý yqtimaldyǵyna bailanysty birden oblys ortalyǵyna jetkizý múmkin bolmady. Únemi baqylaý men tekserýlerden keiin jaǵdaiy áýekóligimen tasymaldaýǵa jaramdy dep tanylyp, Semeige jetkizý týraly sheshim qabyldandy.
Semei meditsina ýniversiteti gospitaliniń dárigerleri, atap aitqanda, gospital direktorynyń pediatriia jónindegi orynbasary, Abai oblysynyń shtattan tys bas anesteziology Dýlat Karimov jáne balalar travmatologiiasy bóliminiń meńgerýshisi, oblystyń shtattan tys bas neirohirýrgi Jasulan Asetov alǵashqy kúnnen bastap Úrjar aýdandyq aýrýhanasynda kómek kórsetip, balany oblys ortalyǵyna jetkizdi», – delingen habarlamada.
Oblystyq Densaýlyq saqtaý basqarmasynyń ókilderi qazirgi ýaqytta ýniversitet gospitalinde zamanaýi qurylǵylardyń kómegimen zardap shekken balanyń jaǵdaiy jan-jaqty tekserilip, tiisti emdeý sharalary júrgizilip jatqanyn aitty.
Ol anesteziia, reanimatsiia jáne qarqyndy terapiia bólimshesinde em qabyldap jatyr.
Esterińizge sala keteiik, Abai oblysy Úrjar aýdanynyń Besterek aýylynda aýyr jol apaty bolyp, úi mańynda oinap júrgen balalardy 55 jastaǵy «Toyota» avtokóliginiń júrgizýshisi qaǵyp ketken.
Saldarynan kámeletke tolmaǵan eki bala oqiǵa ornynda kóz jumsa, bireýi aýrýhanaǵa bara jatqan jolda qaza bolǵan. Olardyń jasy 2-7 jas aralyǵynda. Al jaraqat alǵan taǵy úsh bala aýrýhanaǵa jetkizilgen. Olardyń jasy 6-9 jas aralyǵynda. Zardap shekkender eki otbasynyń balalary.
Memleket basshysynyń tapsyrmasymen Densaýlyq saqtaý ministrligi jaǵdaidy erekshe baqylaýda ustap otyr.
